চিৰাঙৰ বিজনীত বিৰাজ ডেকাৰ সমৰ্থনত ত্ৰিপুৰাৰ প্ৰাক্তন মুখ্যমন্ত্ৰী মাণিক সৰকাৰ

বঙাইগাঁও: ৰাজ্যখনৰ অন্তিম তথা তৃতীয় পৰ্যায়ৰ নিৰ্বাচনৰ দিন চমু চাপি অহাৰ পৰিপ্ৰেক্ষিতত কোকৰাঝাৰ লোকসভা সমষ্টিৰ অধীনৰ চিৰাং জিলাত নিৰ্বাচনত অৱতীৰ্ণ হোৱা ৰাজনৈতিক দল সমূহে প্ৰচাৰ সভা ব্যাপক কৰি তুলিছে ৷ জিলাখনৰ বিজনী চহৰৰ বিদ্যাপীঠ উচ্চতৰ মাধ্যমিক বিদ্যালয় খেল পথাৰত আজি (শুকুৰবাৰ) বিয়লি চিপিআই (এম)ৰ মনোনীত প্ৰাৰ্থী বিৰাজ ডেকাৰ সমৰ্থনত ত্ৰিপুৰাৰ প্ৰাক্তন মুখ্যমন্ত্ৰী তথা দেশৰ বিশিষ্ট ৰাজনীতিক মাণিক চৰকাৰে প্ৰচাৰ সভাত অংশ লয় ৷ এইবাৰ দেশৰ সৰ্বকনিষ্ঠ প্ৰাৰ্থী হিচাপে প্ৰাৰ্থীত্ব আগবঢ়োৱা ২৬ বছৰীয়া বিৰাজ ডেকাৰ নিৰ্বাচনী প্ৰচাৰ সভাত অংশ লৈ ত্ৰিপুৰাৰ প্ৰাক্তন মুখ্যমন্ত্ৰী মাণিক সৰকাৰে দেশত বাওপন্থী সাংসদৰ সংখ্যা বৃদ্ধি কৰি মূল্যবোধৰ ৰাজনীতি প্ৰতিষ্ঠা কৰিবলৈ ন প্ৰজন্মৰ যুৱক বিৰাজ ডেকাক সমৰ্থন জনাই সাংসদ নিৰ্বাচিত কৰিবলৈ ৰাইজলৈ আহ্বান জনায় ৷ মাণিক চৰকাৰে ভাষণত কয়, ‘দেশত বিজেপি নেতৃত্বাধীন চৰকাৰ গঠন হোৱাৰ পাছত সাম্প্ৰদায়িক সংঘাত বৃদ্ধি পাইছে ৷ দেশত বিজেপি দলে প্ৰতিশ্ৰুতি দি চৰকাৰে গঠন কৰিলে যদিও সৰ্বসাধাৰণ জনতাৰ কোনো পৰিৱৰ্তন হোৱানাই ৷ বিদেশত থকা অবৈধ ধন জনসাধাৰণৰ মাজত দিয়াৰ কথা আছিল ৷ কিন্তু কি কৰিলে ৷ এইয়া চৰকাৰ খনৰ মিথ্যাচাৰ ৷ বিগত দিনত নৰেন্দ্ৰ মোদীয়ে সংসদ চলি থকা সময়তো দেশৰ সমস্যাৰ কথাৰ ওপৰত ভাগ নলৈ বিদেশ ভ্ৰমণত ব্যস্ত আছিল ৷ তেওঁৰ কথাই আইন, তেওঁ যি কয় দেশত সেইটোৱে হয় ৷’ গণতন্ত্ৰক কৱৰ দিয়া এনেকুৱা একচ্ছত্ৰী নেতাক সকলোৱে প্ৰত্যাখান কৰি দেশত গণতন্ত্ৰ প্ৰতিষ্ঠা কৰিবলৈ আহ্বান জনায় ৷সৰকাৰে ভাষণত নৰেন্দ্ৰ মোদীয়ে সৰ্বসাধাৰণ জনতাৰ উন্নয়ন সধাৰ বিপৰীতে পুঁজিপতিক হে ধনী কৰিছে বুলি অভিযোগ কৰে ৷