শংকৰ চাহ বাগিচাৰ অপহৃত চাহ কৰ্মচাৰী গৌৰাংগ চন্দ্ৰ দেৱ’ক উদ্ধাৰ কৰাত ব্যৰ্থ সেনা-আৰক্ষী

 অগ্ৰদূত বাৰ্তা,ডুমডুমা, ১৭ অক্টোৱৰঃ তিনিচুকীয়া জিলাৰ তালাপ আৰক্ষী চকীৰ অন্তৰ্গত শংকৰ চাহ বাগিচাৰ অপহৃত চাহ কৰ্মচাৰী তথা হেড ফিটাৰ গৌৰাংগ চন্দ্ৰ দেৱ’ক উদ্ধাৰ কাৰ্যত চুড়ান্তভাৱে ব্যৰ্থ হৈছে সেনা-আৰক্ষী প্ৰশাসন ৷ অসহায় সেনা-আৰক্ষীয়ে আজি সপ্তম দিনাও অপহৃত চাহ কৰ্মচাৰী গৰাকীৰ শুংসুত্ৰ উলিয়াবলৈ সক্ষম নহ’ল সেনা-আৰক্ষীয়ে ৷ দিনে-ৰাতিয়ে তিঘিলঘিলাই ফুৰা সেনা-আৰক্ষীয়ে নিজৰ ব্যৰ্থতা ঢাকিবলৈ অপহৰণ ঘটনাটো সংঘটিত শংকৰ চাহ বাগিচাত আজি সপ্তম দিনাও নিৰাপত্তাৰক্ষীক নিয়োগ কৰে ৷ বাগিচা ’ল’কআউট’ হোৱাৰ সম্ভাব্য পৰিস্থিতিক নিয়ন্ত্ৰণ কৰিবলৈ বাগিচাখনৰ পৰিচালকসকলক আজি সপ্তম দিনাও কৰ্মস্থলীতে নজৰবন্দি কৰি ৰাখে নিৰাপত্তাৰক্ষীয়ে ৷ অপহৃত গৌৰাংগ চন্দ্ৰ দেৱক উদ্ধাৰ কৰাত শংকৰ চাহ বাগিচাৰ স্বত্বাধিকাৰ সুধিৰ কুমাৰ লোহিয়াই কোনো ধৰনৰ ব্যৱস্থা গ্ৰহণ নকৰাৰ অভিযোগ তুলি সদৌ অসম বেংগলী যুৱ-ছাত্ৰ ফেডাৰেচনৰ তিনিচুকীয়া জিলা সমিতিয়ে আজি দুপৰীয়া ধলাত বাইক ৰেলী বাহিৰ কৰাৰ লগতে আহোম গাৱঁস্থিত ৩৭ নং ৰাষ্ট্ৰীয় ঘাইপথত চাহ উদ্যোগপতি গৰাকীৰ পুত্তলিকা দাহ কৰে ৷ ফেডাৰেচনটোৰ নেতৃত্বই অসম চৰকাৰ হায় হায়, সেনা-আৰক্ষী প্ৰশাসন হায় হায়, অপহৃত গৌৰাংগ চন্দ্ৰ দেৱ’ক মুক্তি দিয়ক আদি শ্ল’গানেৰে পুত্তলিকা দাহস্থলী উত্তাল কৰি তোলে ৷ প্ৰতিবাদকাৰীয়ে তালাপ আৰক্ষী চকীৰ প্ৰভাৰী গৰাকীৰ যোগেদি জিলা উপায়ুক্তলৈ অপহৃত চাহ কৰ্মচাৰী গৰাকীক শীঘ্ৰে উদ্ধাৰ কৰাৰ দাবীত এখন স্মাৰক পত্ৰ প্ৰদান কৰে ৷ উল্লেখ্য যে যোৱা ১১ অক্টোৱৰ সন্ধিয়া ৬.৩০ বজাত হাতত একে-৪৭ ৰাইফল লৈ আৰক্ষী কামাণ্ডো পোছাকত অহা চাৰিজনীয়া আলফা স্বাধীনৰ সদস্যই শংকৰ চাহ বাগিচা কলঘৰটোৰ পৰা হেড ফিটাৰ গৌৰাংগ চন্দ্ৰ দেৱ’ক নাটকীয়ভাৱে অপহৰণ কৰি নিয়া পিছ মুহুূৰ্তৰ পৰাই তিনিচুকীয়া জিলাৰ অসম-অৰুণাচল সীমান্তৱৰ্তী সংৰক্ষিত বনাঞ্চলত সেনা-আৰক্ষীয়ে উদ্ধাৰ অভিযান চলাইছিল ৷ ইয়াৰ বিপৰীতে অপহৰণ কাণ্ডটোত কোন জড়িত তাক সেনা-আৰক্ষীয়ে আজিও আনুষ্ঠানিকভাৱে স্পষ্ট নকৰিলে ৷ একেদৰে আলফা স্বাধীনেও অপহৰণ কাণ্ডটোৰ সন্দৰ্ভত আজি পৰ্যন্ত নিজৰ স্থিতি স্পষ্ট কৰাৰ পৰা বিৰত আছে ৷