গুৱাহাটী বিশ্ববিদ্যালয়ৰ গ্ৰীষ্ম বন্ধ বাতিল

গুৱাহাটী: দেশৰ সাম্প্ৰতিক পৰিস্থিতিৰ প্ৰতি লক্ষ্য ৰাখি চলিত শিক্ষা বৰ্ষৰ সমাগত গ্ৰীষ্ম বন্ধ বাতিলৰ সিদ্ধান্ত গ্ৰহণ কৰিছে গুৱাহাটী বিশ্ববিদ্যালয় কৰ্তৃপক্ষই । গুৱাহাটী বিশ্ববিদ্যালয়ৰ পঞ্জীয়কে জি ইউ/পঞ্জীয়ক/(এছএফ)/২০২০ নম্বৰৰ এক নিৰ্দেশনাযোগে অহা পহিলা জুলাইৰ পৰা হ’বলগীয়া গ্ৰীষ্ম বন্ধ বাতিল কৰে । লগতে উক্ত সময়ছোৱাত পূৰ্ণকালীন পাঠদান হ’ব বুলি উক্ত নিৰ্দেশনাত উল্লেখ কৰে । গুৱাহাটী বিশ্ববিদ্যালয়ৰ প্ৰতিটো বিভাগৰ লগতে বিশ্ববিদ্যালয়ৰ অধীনস্থ মহাবিদ্যালয়সমূহৰ ক্ষেত্ৰতো এই নিৰ্দেশনা প্ৰযোজ্য হ’ব । এই নিৰ্দেশনাৰ প্ৰতিলিপি বিশ্ববিদ্যালয়ৰ প্ৰতিটো বিভাগৰ ডীন, শ্ৰেণীসমূহৰ সচিব,মূৰব্বী অধ্যাপক,পৰীক্ষা নিয়ন্ত্ৰক, শৈক্ষিক পঞ্জীয়ক, বিশ্ববিদ্যালয় আইন মহাবিদ্যালয়ৰ অধ্যক্ষ, যুটীয়া পঞ্জীয়ক, উপ পঞ্জীয়ক, উপাচাৰ্যৰ সচিবকে প্ৰমুখ্য কৰি সংশ্লিষ্টসকললৈ প্ৰেৰণ কৰা বুলি নিৰ্দেশনাত উল্লেখ ।