বিশ্বত্ৰাস ক’ভিড-১৯ ৰ সংক্ৰমণ প্ৰতিৰোধৰ বাবে দেশজুৰি বলবৎ হোৱা তলাবন্ধই বিগত সময়ছোৱাত তব্ধ কৰিলে জনজীৱন। দৈনন্দিন কৰ্মব্যস্ত লোকসকল ঘৰতে বন্দী হৈ থাকিবলগীয়া হয়। ইয়াৰ বিকল্পও নাই। কাৰণ সামাজিক দূৰত্ব বজাই ৰাখি নিজৰ নিজৰ কৰ্তব্য সম্পাদন কৰাৰ মানসিকতা বহু লোকৰে নাই। তলাবন্ধই কিছু কিছু ক্ষেত্ৰত গতিশীলতাত জড়তাৰ সৃষ্টি কৰিলেও বহু লোকক পিছে নতুন নতুন সোৱাদ দিলে।
কৰ্মব্যস্ততাৰ অজুহাতত পৰিয়ালৰ লোকৰ সতে সময় অতিবাহিত কৰিবলৈ যিসকলে আহৰি নাপাইছিল তেওঁলোকে তলাবন্ধত ঘৰৰ সকলোৰে স’তে সময় অতিবাহিত কৰিব পাৰিলে। আমি যিহেতু চিকিৎসক সেই বাবে তলাবন্ধৰ সময়ত সময়ত বৰ বেছি কৰ্তব্য সম্পাদনৰ ক্ষেত্রত পার্থক্য নাপালো। অৱশ্যে এটা কথা ঠিক যে সদায় কৰিবলগীয়া হলেও আবেলি পৰত পৰিয়ালৰ সদস্যসকলৰ স’তে হাঁহি ধেমালিৰে পাৰ কৰাৰ সুযোগ নোপোৱা নহয়। জীৱনত কেতিয়াও এনেধৰণৰ পৰিস্থিতিৰ সন্মুখীন হোৱা অভিজ্ঞতা নথকা বাবে কিছু কিছু ক্ষেত্ৰত সমস্যাৰ সন্মুখীন হ’লো।
মোৰ বয়স হৈছে যদিও সদায় কামৰ মাজতে ব্যস্ত থাকে। জ্যেষ্ঠ নাগৰিকৰ শাৰীত অন্তৰ্ভুক্ত হোৱা হেতুকে মই ৰোগী চোৱা যদিও ডাউন টাউন হস্পিতালৰ লগতে অসমডাউন টাউন বিশ্ববিদ্যালয়ৰ কামৰ বাবে পানীখাইতীও গৈছে। কাৰণ তলাবন্ধ হ’লেও চিকিৎসালয়-বিশ্ববিদ্যালয়ৰ কাম-কাজ চলাই নাথাকিলে কৰ্মচাৰীসকলক দা-দৰমহা দিয়াৰ ক্ষেত্ৰত সমস্যাৰ সৃষ্টি হ’লহেতেন। বিশ্ববিদ্যালয়ৰ পাঠদান বন্ধ থাকিলেও আন বহুতো কাম থাকে।
তদুপৰি হাস্পতাল আদিৰ প্ৰশাসনিক দিশটো তদাৰক কৰিবলৈ সদায় কাৰ্যালয়লৈ আহিবলগীয়া হৈছে। চৰকাৰে আগবঢ়োৱা নীতি-নিৰ্দেশনা মানি চলিয়েই আমি কাম-কাজ সম্পাদন কৰিছো। বাকী সময়খিনি পৰিয়ালৰ সদস্যসকলৰ সৈতে কটায়ো ভাল লাগিছে। নিয়মীয়া কাৰ্যখিনি সম্পাদন কৰাৰ উপৰি কেবাখনো বাতৰি কাকত, আলোচনী, কিতাপ আদি পঢ়িছো। টিভি চোৱাৰ বাবে পৰ্যাপ্ত সময় পালো। ‘ৰামায়ণ’, আৰু ‘শ্ৰীকৃষ্ণ’ ধাৰাবাহিক দুখন উপভোগ কৰিলো।
বোৱাৰীয়ে পাকঘৰত ব্যস্ত থকা বাবে নতুন নতুন খাদ্য সম্ভাৰৰ সোৱাদ পালো। পকা বেলৰ চৰ্বত নিয়মীয়াকৈ খাইছো। পানীখাইটীলৈ গৈ পকা বেল আনো। খাবলৈও পৰ্যাপ্ত সময়। আটাইতকৈ বেছি ভাল লাগিছে এইবাবে যে আমি পৰিয়ালৰ সকলোৱে একেলগে বহি হাঁহি-ধেমালিৰে খাদ্য গ্ৰহণ কৰিবলৈ সময় পাইছো। সাধাৰণতে আন সময়ত সকলোৱে কৰ্মব্যস্ত হোৱা বাবে একেলগে বহিবলৈ কাচিৎহে সময় পাইছিলো। ঘৰৰ লগতে হস্পিতালৰ ছাদৰ ওপৰত খেতি কৰিছো। বিভিন্ন ধৰণৰ শাক-পাচলি, জলকীয়া, ফল-মূলৰ গছপুলি ৰুইছো। নিজে সেইবোৰ প্ৰতিপালন কৰিছো।
প্ৰতি সপ্তাহত মই সোণাপুৰলৈ যাওঁ মই। পৰিয়ালৰ সদস্যৰ সতে কিছু সময় কটাও। তলাবন্ধত গৈছো যদিও আগৰ দৰে মুকলি মনেৰে উপভোগ কৰিব পৰা নাই। তদুপৰি মই সদায় ৰোগী চাই ভাল পাওঁ। তলাবন্ধৰ সময়ছোৱাত ৰোগী চাব নোৱাৰাৰ বাবে মনটো বেয়া লাগি আছে। ইয়াৰ মাজতে অতীতৰ বহুতো কথা লিখিবলৈ সময় পাইছো। গাৱঁৰ সেই দিনৰ বহুতো কথা লিখিবলৈ সময় পাইছো। গাৱঁৰ সেই দিনৰ বহু কথাই মানসপটত সজীৱ হৈ আছে।
সেইবোৰ লিপিবদ্ধ কৰিবলৈ সুযোগ পালো। তলাবন্ধৰ সময়ছোৱাত স্বাভাৱিক ভাবেই কৰ্তব্য সম্পাদন কৰিবলৈ আজৰি সময় পাইছো। সাধাৰণতে মই ৰোগী চোৱাৰ লগতে হাস্পতাল, বিশ্ববিদ্যালয়ৰ প্ৰশাসনিক ক্ষেত্ৰত চকু দিবলগীয়া হয়। ইয়াৰ মাজতে বিভিন্ন সামাজিক কাম-কাজ কৰিবলৈ বাহিৰলৈ ওলাই যাওঁ। তলাবন্ধৰ বাবে সামাজিক কাম-কাজৰ পৰা আঁতৰি থাকিবলগা হোৱা বাবে বেয়া লাগিছে যদিও ক’ভিড-১৯ প্ৰতিৰোধৰ বাবে আমি সকলোৱে সতৰ্ক হ’বই লাগিব।
ক’ভিড-১৯ প্ৰতিৰোধৰ বাবে সকলোৱে চৰকাৰ তথা স্বাস্থ্য বিভাগে আগবঢ়োৱা নীতি নিৰ্দেশনা পালন কৰা উচিত। মই যদিও ৰোগী চোৱা নাছিলো তথাপি বহুতো ৰোগীয়ে মোক ফোন কৰি সুধিছিল, ছাৰ চিকিৎসালয়লৈ বেমাৰ দেখুৱাবলৈ গ’লে ক’ভিড-১৯ হ’ব নেকি?’ হাস্পতাললৈ অহা কোনো ৰোগীৰ লক্ষণ সম্পৰ্কে সন্দেহ কৰিলে চিকিৎসকে মহাবিদ্যালয়লৈ গৈ পৰীক্ষা কৰিবলৈ পৰামৰ্শ আগবঢ়ালে ক্ষুব্ধ হৈ চিকিৎসালয় ত্যাগ কৰা ঘটনাও সংঘটিত হৈছে।
তেওঁলোকৰ মংগলৰ বাবে তথা সকলোকে সুৰক্ষিত কৰি ৰাখিবলৈকে চিকিৎসকে সন্দেহজনক ৰোগীক পৰীক্ষাৰ বাবে পঠিয়াই দিয়া ফলত ৰোগী ক্ষুব্ধ হোৱাৰ কোনো যুক্তি নাই। চিকিৎসকৰ লগতে হাস্পতালৰ প্ৰতিগৰাকী কৰ্মীয়ে সতৰ্কতাৰে কাম-কাজ সম্পাদন কৰিছে। তলাবন্ধৰ মাজতো এইবোৰ কামত সদায় গুৰুত্ব প্ৰদান কৰি আহিছো।