চাৰিটা বছৰ সম্পূৰ্ণ কৰিলে সোণোৱাল নেতৃত্বাধীন বিজেপি মিটজোঁটৰ চৰকাৰেঃ মুখ্যমন্ত্ৰীৰ কৃতজ্ঞতা প্ৰকাশ

ৰাজ্যৰ বিজেপি নেতৃত্বাধীন মিটজোঁটৰ চৰকাৰে দেওবাৰে চাৰিটা বছৰত ভৰি দিলে | এই উপলক্ষে ৰাজ্যবাসীলৈ কৃতজ্ঞতা প্ৰকাশ কৰি মুখ্যমন্ত্ৰী সৰ্বানন্দ সোণোৱালে কয়, “ৰাইজৰ আশীৰ্বাদ, বিশ্বাস আৰু নিৰৱচ্ছিন্ন সহযোগিতাৰে ভাৰতীয় জনতা পাৰ্টি নেতৃত্বাধীন মিত্ৰজোঁটৰ চৰকাৰখনে আজি চাৰিটা বছৰ সম্পূৰ্ণ কৰিলে । অনাগত এবছৰ সফলতাৰে সম্পূৰ্ণ কৰাৰ ক্ষেত্ৰতো আপোনালোকৰ আশিস আৰু একেধৰণৰ সহায়-সহযোগিতা কামনা কৰিছোঁ । ৰাজ্যখনৰ প্ৰতিজন লোকে যাতে সুস্থ-সবল আৰু নিৰোগী হৈ থাকে, তাৰ বাবে আমি সন্মিলিত প্ৰচেষ্টাৰে অহৰ্নিশে কাম কৰি যাম । এই প্ৰতিকূল সময়ত আগবঢ়োৱা সহযোগিতাৰ বাবে সংবাদ মাধ্যমৰ মই বিশেষ শলাগ লৈছোঁ।বিগত চাৰিটা বছৰত অসমৰ সৰ্বাংগীণ উন্নয়নৰ লক্ষ্যৰে আমি যথাসম্ভৱ সকলো প্ৰচেষ্টাই গ্ৰহণ কৰিছোঁ। এই সময়ছোৱাত আপোনালোকে অকুণ্ঠভাৱে আগবঢ়োৱা সহযোগিতাৰ বাবে সকলোৰে প্ৰতি মোৰ আন্তৰিক শ্ৰদ্ধা, কৃতজ্ঞতা আৰু ধন্যবাদ জ্ঞাপন কৰিলোঁ।”