তলাবন্ধৰ প্ৰক্ৰিয়া সম্পূৰ্ণ হোৱাৰ পাছত দেশত ইতিমধ্যে পৰ্যায়ক্ৰমে খোলা হৈছে তলা খোলাৰ ব্যৱস্থা। বিধি নিষেধত অত্যাধিক পৰিমাণে শিথিলতা অনাত দেশৰ কামৰ বজাৰত দেখা গৈছে স্বস্তিৰ আভাষ ৷ কিছু পৰিমাণে হ’লেও দেশত কৰ্মহীনৰ হাৰ কমিবলৈ আৰম্ভ কৰা পৰিলক্ষিত হৈছে । অৱশ্যে আগৰ তুলনাত সামান্য কমিলেও নিবনুৱাৰ হাৰ এতিয়াও উদ্বেগজনক হৈয়ে আছে ৷ উল্লেখযোগ্য যে কৰ’না ভাইৰাছে ভাৰতত তাণ্ডব আৰম্ভ কৰাৰ পূৰ্বেও দেশৰ অৰ্থনীতি বিশেষ আশাব্যঞ্জক নাছিল ৷ সেই সময়ত দেশত নিবনুৱাৰ হাৰ আছিল সাত শতাংশৰ আশে পাশে ৷ কিন্তু কৰ’নাৰ ভৰত অৰ্থনীতিৰ কঁকাল একপ্ৰকাৰ ভাঙি পৰিছে ৷ তলাবন্ধৰ ফলত মাত্ৰ দুমাহৰ ভিতৰতে নিবনুৱাৰ হাৰ সাত শতাংশৰ পৰা বৃদ্ধি পাই ২৭ শতাংশত উপনীত হৈছিল । লাহে লাহে তলাবন্ধৰ বিধি নিষেধ হ্ৰাস পাই অহাত অৰ্থনৈতিক কাৰ্যকলাপ পুনৰ আৰম্ভ কৰা হৈছে ৷ ইয়াৰ সমান্তৰালকৈ কৰ্মহীনতাৰ ছবিখনৰো কিছু পৰিমাণে পৰিৱৰ্তিত হৈছে ৷
বিশেষকৈ গ্ৰামাঞ্চলত এই ছবিখন যথেষ্ট আশাব্যঞ্জক । দেশৰ অৰ্থনীতি “থিংক টেংক” স্বৰূপ “চেন্টাৰ ফৰ মণিটৰিং ইণ্ডিয়ান ইক’নমী”ৰ প্ৰতিবেদনত কোৱা হৈছে যে মে’ত দেশত নিবনুৱাৰ হাৰ আছিল ২৩.৪৮ শতাংশ । অৰ্থাৎ যোৱা মাহত দেশৰ প্ৰতি পাঁচজন লোকৰ এজন আছিল নিবনুৱা । এই পৰিসংখ্যাত আগৰ মাহৰ তুলনাত সামান্য স্বস্তি লাভ কৰিছে ভাৰতে ৷এপ্ৰিলত দেশত নিবনুৱাৰ হাৰ আছিল ২৩.৫২ শতাংশ । চি এমআইই ৰ তৰফৰ পৰা দাবী কৰা হৈছিল যে এপ্ৰিলত দেশত প্ৰায় ১২ কোটি ৫০ লক্ষ কৰ্মক্ষম লোক নিবনুৱা হৈ বহি আছিল । মে’তো ছবিখন প্ৰায় একে। কেন্দ্ৰীয় চৰকাৰে দেশত লাহে লাহে তলা খোলাৰ প্ৰক্ৰিয়া আৰম্ভ কৰাৰ পিছতেই সৰু সৰু অৰ্থনৈতিক কাৰ্যকলাপ আৰম্ভ হৈছে। যাৰ ফলত নিবনুৱাৰ সমস্যা সামান্য হ্ৰাসৰ ইংগিত পোৱা গৈছিল ৷ বিগত মাহৰ তুলনাত গ্ৰামাঞ্চলত নিবনুৱাৰ হাৰ কমিছে প্ৰায় আঠ শতাংশ।