অৱশেষত সেনাৰ উচ্চ পৰ্যায়ৰ বহু বৈঠকৰ পিছত ভাৰত চীন সীমান্তৰ আলোচনা যোগাত্মক ৰূপে পৰিগণিত হৈছে ৷ কাৰণ দুয়োখন দেশৰ সেনা পূব লাডাখৰ পৰা পিছুৱাই যাবৰ কাৰণে সন্মতি প্ৰদান কৰিছে ৷ ইফালে সোমবাৰে প্ৰায় ১১ ঘন্টা জুৰি চলা ভাৰত আৰু চীনৰ কৰ্পছ কমাণ্ডাৰ পৰ্যায়ৰ আলোচনা হৈছিল ৷ এই আলোচনাত দুয়ো পক্ষই ভাৰত চীনৰ শান্তি বৰ্তাই ৰাখিবলৈ সিদ্ধান্ত লৈছিল ৷ ইতিমধ্যে সেনা প্ৰধান জেনেৰেল মনোজ মুকুন্দ নাৰাৱন ৰাওনা হৈছে লাডাখলৈ ৷
সেনা প্ৰধান নাৰাৱনে মংগলবাৰ আৰু বুধবাৰে লাডাখত কামাণ্ডাৰসকলৰ স’তে চীনা সৈন্যৰ সৈতে চলি থকা বিগত ছয় সপ্তাহজোৰা উত্তেজনাৰ সম্পৰ্কত আলোচনা কৰিব ৷ উল্লেখযোগ্য যে ভাৰত চীন সীমান্ত সংঘৰ্ষৰ সন্দৰ্ভত এইবাৰ সাতদিনতে পিছুৱাই যাবলৈ বাধ্য হয় চীন ৷ ১৫ জুনত ভাৰত চীন সীমান্তত হোৱা সংঘৰ্ষত ২০ জন সৈনিক শ্বহীদ হৈছিল ৷ চীনৰ প্ৰায় ৪০ জন সেনাৰ মৃত্যু হয় ৷ ইয়াৰ পিছতে সীমান্তত ইখনৰ পিছত সিখন উচ্চস্তৰীয় বৈঠক অনুষ্ঠিত হৈছিল ৷