বহু তৰ্ক বিতৰ্কৰ অন্তত আহিল সুশান্ত সিং ৰাজপুতৰ মৰণোত্তৰ পৰীক্ষাৰ ৰিপৰ্ট ৷ ৰিপৰ্ট অনুসৰি সুশান্তৰ মৃত্যু ডিঙিত ফাঁচী লগোৱাৰ কাৰণেই হৈছে৷পাঁচজন চিকিৎসকৰ তত্ত্বাৱধানত তৈয়াৰ হোৱা এই ৰিপৰ্টত কোৱা হৈছে যে ডিঙিত ফাঁচী লগোৱাৰ কাৰণে উশাহ নিশাহ বন্ধ হৈ মৃত্যু হৈছে সুশান্তৰ ৷
আনহাতে সুশান্তে আত্মহত্যা কৰা প্ৰসংগৰ সন্দৰ্ভত পৰীক্ষা কৰিবলৈ মুম্বাই পুলিচে মহাৰাষ্ট্ৰ ফৰেণছিক বিভাগক দায়িত্ব দিছে ৷ইয়াৰ ৰিপৰ্ট আহিবলৈ এতিয়াও বাকী আছে ৷অৱশ্যে মুম্বাইৰ পুলিছে মহাৰাষ্ট্ৰ ফৰেণছিক বিভাগক ইয়াৰ পৰীক্ষা ক্ষিপ্ৰ গতিৰে কৰিবলৈ নিৰ্দেশ দিছে । ইফালে মৰণোত্তৰ পৰীক্ষাৰ ৰিপৰ্ট অহাৰ পূৰ্বে সুশান্তৰ পৰিয়ালে এই সমগ্ৰ ঘটনা হত্যা নে আত্মহত্যা, সেই বিষয়ত চিবিআইৰ তদন্তৰ দাবী কৰিছিল ৷
সুশান্তৰ আত্মহত্যাৰ প্ৰসংগত এতিয়ালৈকে ২৩ জন লোকক সোধপোছ কৰিছে ৷ইয়াৰ ভিতৰত সুশান্তৰ পৰিয়াল লোক,বন্ধু,পুৰণি মেনেজাৰ,ঘৰৰ কৰ্মচাৰী,গাৰ্লফ্ৰেণ্ড ৰিয়া চক্ৰৱৰ্তী আদি ৷ বিগত সময়ত সুশান্তে আত্মহত্যা কৰাৰ পূৰ্বে কাৰ সৈতে কথা পাতিছিল সেই সন্দৰ্ভত তদন্ত অব্যাহত ৰাখিছিল আৰক্ষীয়ে ৷
সম্প্ৰতি সুশান্তে আত্মহত্যা কৰাৰ আগমুহূৰ্তত মেনেজাৰ উদয় সিং গৌৰীৰ লগত কোনো ছবিৰ সন্দৰ্ভত কথা পাতিছিল বুলি জানিব পৰা গৈছে। গতিকে তদন্ত আওতাত আহিব মেনেজাৰ উদয় সিং ৷ উল্লেখযোগ্য যে যিসমূহ সংবাদমাধ্যমে সুশান্তৰ মৃত্যুৰ সন্দৰ্ভত বিভিন্ন দাবী কৰি আহিছে, সেইসমূহকো তদন্ত কৰিব পুলিচে। গতিকে,মুম্বাইৰ পুলিচ মহেশ ভাট্টৰ সন্দৰ্ভত প্ৰচাৰিত খবৰৰ ভিত্তি বিচাৰিও সংবাদমাধ্যমক তদন্ত কৰিব পাৰে।