চীনক চাইকেল যোগানৰ বাবে কৰা চুক্তি শেহতীয়াকৈ বাতিল কৰাৰ সিদ্ধান্ত গ্ৰহণ কৰিছে হিৰো চাইকেলৰ অধ্যক্ষ তথা পৰিচালন সঞ্চালক পংকজ মুঞ্জলে । উল্লেখ্য যে চীনক চাইকেল যোগানৰ বাবে হিৰো চাইকেলৰ স’তে নশ কোটি টকাৰ চুক্তি সম্পন্ন হৈছিল । ভাৰত-চীনৰ শেহতীয়া যুদ্ধ সদৃশ পৰিস্থিতিৰ পৰিপ্ৰেক্ষিততে এই চুক্তি একপক্ষীয়ভাৱে বাতিল কৰিছে হিৰো চাইকেলে ।
মুঞ্জলে জনোৱা অনুসৰি, অহা তিনি মাহত চীনক নশ কোটি টকাৰ চাইকেল যোগান ধৰিবলৈ এখন বাণিজ্যিক চুক্তি সম্পন্ন হৈছিল; শেহতীয়াকৈ চীনক বর্জনৰ বাবে দেশজুৰি নতুন ৰূপত আন্দোলন আৰম্ভ হৈ গৈছে । দেশবাসীয়ে চীনৰ পৰা অহা পণ্য বৰ্জন কৰিবলৈ সিদ্ধান্ত গ্ৰহণ কৰিছে । এনে পৰিস্থিতিত চীনৰ বিৰুদ্ধে তথা দেশৰ স্বাৰ্থত থিয় হৈছে হিৰো চাইকেল । বাণিজ্যিক চুক্তি খন বৃহৎ অংকৰ হ’লেও দেশৰ স্বাৰ্থতে চুক্তি বাতিলৰ সিদ্ধান্ত লয় ভাৰতৰ জনপ্ৰিয় কোম্পানীটোৱে ।
মুঞ্জলে কয় যে তলাবন্ধৰ ফলত কোম্পানীৰ আৰ্থিক ক্ষতি হোৱা সত্ত্বেও দেশৰ স্বাৰ্থত কোনো আপোচ কৰিব নিবিচাৰে হিৰো চাইকেলে । চীনৰ স’তে হোৱা চুক্তি বাতিলৰ পাছত বিদেশত চাইকেল ৰপ্তানিৰ বাবে নতুন বজাৰৰ সন্ধান কৰা হ’ব । ইতিমধ্যে এই সন্দৰ্ভত দুই-এখন দেশৰে চুক্তি সম্পন্ন কৰাৰ পথত অগ্ৰসৰ হৈছে কোম্পানী । অগ্ৰাধিকাৰ ভিত্তিত সবাতোকৈ আগত আছে জাৰ্মানী । এই দেশখনত হিৰোচাইকেলৰ এটি নতুন কাৰখানা স্থাপনৰ পৰিকল্পনাও আছে কোম্পানীৰ।