কৰ’না ভাইৰাছৰ প্ৰকোপ বৃদ্ধি ৰোধৰ সম্পূৰ্ণ তলাবন্ধই একমাত্ৰ সম্ভাব্য উপায় বুলি মত প্ৰকাশ কৰিছে বিশ্ব স্বাস্থ্য সংস্থাই ৷ সংস্থাটোৰ শীৰ্ষ বিষয়াই কয় যে সকলোবোৰ দেশত তলাবন্ধ শিথিলৰ পিছতে কৰ’নাৰ সংক্ৰমণ বৃদ্ধি পোৱাত বিশ্বজুৰি অধিক তলাবন্ধ সম্ভৱপৰ ৷ সংস্থাটোৰ বিষয়া ডা° মাইকেল ৰায়ানে এক সংবাদমেলত এই কথা সদৰী কৰে ৷ অদূৰ ভৱিষ্যতে সম্পূৰ্ণ তলাবন্ধৰ পৰিস্থিতি হ’ব পাৰে বুলি ৰায়ানে কয়। ইয়াৰে পূৰ্বে হুৰ সঞ্চালক প্ৰধান ডা° টেড্ৰছ আধানম গেব্ৰিয়েছাছে পূৰ্বতে কৈছিল যে এই ভাইৰাছক নিয়ন্ত্ৰণধীন কৰিব পৰা যাব ৷ কিন্তু ইয়াৰ প্ৰকোপ বৃদ্ধিয়ে প্ৰকট কৰিছে যে এই ভাইৰাছ নিয়ন্ত্ৰণৰ বাহিৰত ৷ দিনে দিনে শোচনীয় ৰূপ লৈছে । তথ্য অনুসৰি বিশ্ব জুৰি ছয় সপ্তাহত কৰ’নাত আক্ৰান্তৰ সংখ্যা দুগুণ হৈছে ৷
ইপিনে ৰায়ানে কয় “সাম্প্ৰতিক পৰিস্থিতিত আমি এই ভাইৰাছৰ বিনাশ অথবা মোচন কৰাটো সম্ভৱপৰ নহয় ।” ভৱিষ্যতে অধিক ভয়াৱহ বুলি তেওঁ কয় ৷তেওঁ উদ্বেগ প্ৰকাশ কৰে যে বৃহৎসংখ্যক লোক সমবেত হোৱা অনুষ্ঠানত ই ভয়াৱহ ৰূপ ল’ব পাৰে ৷ এই ভাইৰাছৰ বনজুইৰ দৰে বিয়পাৰ পূৰ্বে সৰু পৰিসৰত জ্বলন্ত অৱস্থাতে ইয়াক বিনাশৰ বাবে প্ৰতিখন দেশে ব্যৱস্থা ল’ব লাগে বুলি ৰায়ানে কয় ৷ ইতিমধ্যে হুৱে প্ৰকাশ কৰিছে যে কৰ’না ভাইৰাছ বতাহৰ কণাতে বিয়পিব পাৰে । ই বতাহত কে’বা ফুট ওপৰলৈ ভাহিব পাৰে ৷