কাৰ্বি আংলং জনস্বাস্থ্য কাৰিকৰী বিভাগৰ মইমতালি আৰু অভিযন্তা, ঠিকাদাৰৰ দূৰ্নীতিৰ ফলত দহোটাকৈ বছৰ পাৰ হোৱাৰ পাছতো কাৰ্যক্ষম হৈ নুঠিল বৃহত্তৰ বোকাজান নগৰ পানী যোগানৰ দহ কোটি টকীয়া আঁচনি ৷ উত্তৰ-পূৱ উন্নয়ন মন্ত্ৰণালয়ৰ ২০০৮-০৯ চনৰ এন.এল.চি.পি.আৰৰ অধীনৰ আঁচনিৰ দ্বাৰা নিৰ্মিত পানী যোগান আঁচনিখন সম্প্ৰতি বগাহাতীত পৰিণত হোৱা পৰিলক্ষিত হৈছে ৷ এই আঁচনি খনৰ উদ্দেশ্য আছিল নগৰৰ প্ৰতিঘৰ আবাসীকে বিশুদ্ধ খোৱা পানী যোগান ধৰা ৷
২০০৯-১০ চনতে নিবিদাৰ জৰিয়তে কাম লাভ কৰা ঠিকাদাৰে বোকাজান ব্লক খেলপথাৰৰ সমীপত নিৰ্মাণ কাৰ্য আৰম্ভ কৰি বৃহৎ ৰিজাৰ্ভৰ আৰু ১৩৯ মিটাৰ গভীৰ নলীনাদৰ কাম সম্পূৰ্ণ কৰিলে যদিও নিৰ্মাণকাৰ্য সম্পূৰ্ণ হোৱাৰ দিন ধৰি অব্যৱহৃত ভাৱেই পৰি থাকিল সকলো যন্ত্ৰাংশ ৷ ক্ৰমাৎ জৰাজীৰ্ণ হৈ পৰা পানী যোগান আঁচনি কাৰ্যক্ষম নোহোৱাত স্থানীয় ৰাইজ আৰু বিভিন্ন দল সংগঠনে মুকলি ভাৱে ক্ষোভ প্ৰকাশ কৰাৰ ফলতেই কে’বা বছৰৰ পিছত বিগত ২০১৯ চনৰ ৬ জুলাই তাৰিখে অসম চৰকাৰৰ যুটীয়া সচিৱ দুলাল পেগুৰ নেতৃত্বত এটি পাঁচ জনীয়া দলে উক্ত পানী যোগান আঁচনিখন পৰিদৰ্শন কৰে ৷
এই দলটোৰ লগত বোকাজান বিধান সভা সমষ্টিৰ বিধায়ক ডাঃ নোমল মমিন আৰু কাৰ্বি আংলং স্বায়ত্ত্ব পৰিষদৰ কে’বাজনো কাৰ্যবাহী সদস্যইও সংগ প্ৰদান কৰিছিল ৷ কিন্ত তাৎপৰ্যৰ বিষয় যে সমগ্ৰ নগৰখনতে পানী যোগান ধৰিব লগীয়া আঁচনিখনত পৰিদৰ্শনৰ খবৰ পাই জনস্বাস্থ্য কাৰিকৰী বিভাগে দুটা দিনৰ ভিতৰত নগৰৰ প্ৰায় দুই কি:মি পথত নলা বহুৱাই আঁচনিখনৰ সক্ৰিয়তাক প্ৰমাণ কৰিবলৈ মিথ্যাচাৰৰ আশ্ৰয় লয় ৷ পৰিদৰ্শন কমিটিৰ আগত আঁচনি খনৰ দায়িত্বত থকা কাৰ্বি আংলং জনস্বাস্থ্য কাৰিকৰী বিভাগৰ অভিযন্তা গৰাকীয়ে ব্যক্ত কৰে যে কম সময়ৰ ভিতৰত প্ৰতিঘৰ আবাসীয়ে পানী পাবলৈ সক্ষম হব ৷
আনকি একো একোটা অঞ্চল লৈ এখন সমিতি গঠন কৰি সেই সমিতিৰ অধীনত থকা প্ৰতিঘৰ আবাসীৰ পৰা নূ্ন্যতম দহ টকাৰ বিনিময়ত তেওঁলোকে পানী যোগান ধৰিব বুলিও পৰিদৰ্শন কমিটিক আকৰ্ষিত কৰিবলৈ চেষ্টা কৰিছিল ৷ বিভাগীয় চল চাতুৰিত পৰিদৰ্শন কমিটি ঘূৰি গল কিন্ত আজিও নগৰৰ আবাসী সকলৰ ঘৰত বিশুদ্ধ পানীৰ সংযোগ নহ’ল, তাৰ বিপৰীতে বৰ্তমান প্ৰকট হৈ পৰিছে জনস্বাস্থ্য কাৰিকৰী বিভাগৰ দ্বাৰা সংঘটিত দূৰ্নীতিত ৰাজহুৱা ধনৰ ব্যাপক অপব্যৱহাৰ ৷
পৰিদৰ্শন কমিটি অহাৰ পূৰ্বে খৰতকীয়াকৈ বিভাগে নগৰখনৰ প্ৰায় দুই কি:মি: পথত যি নলা বহুৱাইছিল বৰ্তমান সেইবোৰ পুনৰ লৈ যাবলগীয়া হৈছে বিভাগটোৱে, কাৰণ ৩৯ নং ৰাষ্ট্ৰীয় ঘাইপথৰ মেৰামতিৰ কাম চলি থকাত মাথো এফুট তলত পুতি থোৱা নলা সমূহ সম্পূৰ্ণৰূপে বাহিৰলৈ ওলাই অহাত উপায়ন্তৰ জনস্বাস্থ্য কাৰিকৰী বিভাগে তৎপৰতাৰে জনচক্ষুৰ পৰা আঁতৰাই নিছে ৷
আনকি জেচিবিৰ হাতোৰাত বহু ঠাইত এই নলাবোৰ টুকুৰা টুকুৰকৈ ভাঙি যোৱাও পৰিলক্ষিত হৈছে ৷ ৰাজহুৱা ধনৰ এনে অপচয় আৰু জনস্বাস্থ্য কাৰিকৰী বিভাগৰ মিথ্যাবাদী ভূমিকাত অসন্তুষ্ট নগৰবাসীয়ে অতি সোনকালে আঁচনি খনত সংঘটিত দূৰ্নীতিৰ তদন্ত বিচৰাৰ লগতে শীঘ্ৰে কাৰ্যক্ষম কৰি তুলিবলৈ মত ব্যক্ত কৰিছে ৷