বেণ্ডপাৰ্টিৰ শব্দ শুনি চুবুৰীয়াৰ বাসিন্দাসকল আচৰিত হৈছিল ৷ এই তলাবন্ধৰ মাজত কোনে এইদৰে বিবাহৰ আয়োজন কৰিলে ৷ তাকো ওচৰ চুবুৰীয়া কোনেও নজনাকৈ ৷ বহুতে বেণ্ডপাৰ্টি লৈ গান বাজনা কৰি অহা বৰযাত্ৰীক চাবলৈ আহিল ৷ কিন্তু বাহিৰলৈ আহিয়েই সকলো স্তম্ভিত হ’ল ৷ বেণ্ডপাৰ্টি বজাই কোনো দৰাই কইনা নিবলৈ অহা নাই ৷ বৰঞ্চ আৰক্ষীহে আহিছে এজন অভিযুক্তক নিবলৈ ৷
সম্প্ৰতি এই মজাৰ ঘটনা সংঘটিত হ’ল বিহাৰত ৷ বিহাৰ আৰক্ষীৰ অপৰাধ দমন শাখাৰ কাৰ্যকলাপৰ এক বিশেষ কৌশল শেহতীয়াকৈ আকৰ্ষণৰ কেন্দ্ৰ বিন্দু হৈ পৰিছে ৷ কেতিয়াবা যদি অপৰাধীক কৰায়ত্ত কৰা বাবে তান্ত্ৰিকৰ শৰণাপন্ন হয়, আন কেতিয়াবা আকৌ আইন ভংগকাৰীক বিমান কৰাই দিয়ে ৷ ঠিক এনে এক অভিনৱ কাণ্ডৰে বিহাৰৰ আৰক্ষীয়ে শিৰোনামা দখল কৰিছে ৷
এই কাণ্ড সংঘটিত হৈছে ৰাজ্যখনৰ ভাগলপুৰৰ মাডোয়া জিলাত ৷ চন্দন যাদৱ নামৰ এজন অভিযুক্তৰ বাসগৃহত বেণ্ডপাৰ্টি লৈ উপস্থিত হয় বিহাৰ আৰক্ষী৷ অভিযুক্ত চন্দনৰ বিৰুদ্ধে একাধিক গোচৰ আদালতত বিচৰাধীন হৈ আছে ৷ কিন্তু বিগত কিছুদিন ধৰি তেওঁ পলাতক । ইয়াৰ মাজতে চন্দনৰ নামত আদালতৰ পৰা চমনো জাৰি হয় । দুদিনমানৰ পূৰ্বে আৰক্ষীয়ে গৈ লোকজনৰ ঘৰত আদালতৰ চমন আঁৰি থৈ আহে ৷ লগতে পৰিয়ালৰ লোকক পৰামৰ্শ দিয়ে যে তেওঁলোকে যাতে চন্দনক আত্মসমৰ্পণ কৰিবলৈ বাধ্য কৰায় ৷
আদালতৰ নিৰ্দেশ অনুসৰি নিৰ্ধাৰিত সময়ৰ পূৰ্বে আত্মসমৰ্পন নকৰিলে চন্দন বিৰুদ্ধে অভিযান চলোৱা হ’ব ৷ আৰক্ষীয়ে পৰিয়ালৰ লোকক ক’লে এইবাৰ তেওঁলোকে আনন্দ ফুৰ্তি কৰিলে ৷ কিন্তু পুনৰ আহিবলগীয়া হ’লে কোনো আনন্দ ফুৰ্তি নাথাকিব ৷ আৰক্ষীয়ে পৰিয়ালৰ লোকক কয় যে চন্দনক আত্মসমৰ্পন কৰোৱাৰ ক্ষেত্ৰত তেওঁলোকৰ ভূমিকা গুৰুত্বপূৰ্ণ ৷ আৰক্ষীৰ এই কাৰ্যই সকলোৰে মাজত চৰ্চা লাভ কৰিছে ৷