সমগ্ৰ বিশ্বত কৰ’নাৰ আক্ৰান্তৰ সংখ্যাই কেতিয়াবাই কোটিৰ ঘৰ স্পৰ্শ কৰিছে ৷ মৃত্যুৰ সংখ্যাও ক্ৰমাৎ উৰ্ধ্বগামী হৈছে । যিকোনো সময়তে ছয় লাক স্পৰ্শ কৰিব ৷ সংক্ৰমণৰ তালিকাত শীৰ্ষস্থানত থকা আমেৰিকাত ইতিমধ্যে এক লাখ ৪০ হেজাৰ লোকৰ মৃত্যুৰ পাছতো দেশখনৰ নাগৰিকসকল দিশহাৰা হৈ আছে ৷ ইয়াৰ কাৰণ ব্যাখ্যা কৰিবলৈ গৈ আমেৰিকাৰ একাংশ সংবাদ মাধ্যমে দাবী কৰিছে যে এই ক্ষেত্ৰত অধিক পৰিমাণে দায়ী বিশ্ব স্বাস্থ্য সংস্থা ৷
শেহতীয়াকৈ ২৩৯ জন বিজ্ঞানীয়ে আমেৰিকাৰ এখন দৈনিক কাকতত “হু”ক উদ্দেশ্য কৰি এখন মুকলি পত্ৰ লিখিছিল ৷ বিজ্ঞানীসকলে দাবী তোলে যে হু ৱে তেওঁলোকৰ নিৰ্দেশিকাত ক’ভিড-১৯ ক বায়ুবাহিত ৰোগ ৰূপে উল্লেখ কৰক। ইয়াৰ পিছতে হুৱে চাপত পৰি নিৰ্দেশিকা পৰিৱৰ্তন কৰি জনালে যে সম্পূৰ্ণৰূপে বায়ুবাহিত নহ’লেও এই ভাইৰাছে বন্ধ কোঠাৰ বতাহত বিয়পিব পাৰে ৷ অৱশ্যে হুৰ এনে মত পৰিৱৰ্তন নতুন কথা হৈ থকা নাই ৷ কৰ’নাৰ সংক্ৰমণৰ আৰম্ভণিতে হুৰ তৰফৰ পৰা কোৱা হৈছিল যে সকলো সময়তে মাস্ক পৰিধান কৰি থকাৰ প্ৰয়োজন নাই । পাছত সংস্থাটোৱেই সকলো দেশৰ চৰকাৰক মাস্ক পৰিধান কৰাটো বাধ্যতামূলক কৰাৰ বাবে হেঁচা প্ৰয়োগ কৰে ৷
আমেৰিকাৰ এখন দৈনিক কাকতত লিখিছে, “সংক্ৰমণ ৰোধ কৰিবলৈ মুখত মাস্ক পৰিধান কৰা উচিত নে অনুচিত ৷ এই বিষয়ত হুৱে স্পষ্ট বাৰ্তা দিব নোৱাৰিলে ৷ তেওঁলোকে এটা সময়ত কৈছিল যে অসুস্থ হ’লেহে মাস্ক পৰিধান কৰক ৷ হুৰ এই ধৰণৰ বাৰ্তাতাই সমগ্ৰ বিশ্বজুৰি এই বিষয়ত অনিশ্চয়তাৰ সৃষ্টি হৈছে ৷ উল্লেখযোগ্য যে হু ৰ সমান্তৰালকৈ সাধাৰণ লোকক সন্দিহান কৰি তোলাৰ ক্ষেত্ৰত একাংশ ৰাষ্ট্ৰনেতাৰ ভূমিকাও অনেক ৷ আমেৰিকাৰ ৰাষ্ট্ৰপতি ড’নাল্ড ট্ৰাম্প আৰম্ভণিৰে পৰাই মাস্কৰ বিৰোধী আছিল । আনকি তেওঁ পাৰস্পৰিক দূৰত্বৰ প্ৰয়োজনীয়তাও মানিবলৈ বাধ্য হোৱা নাছিল ৷
আনহাতে ব্ৰিটিছ প্ৰধানমন্ত্ৰী বৰিছ জনছনে প্ৰথম অৱস্থাত মুকলিমূৰীয়াকৈ ঘুৰি ফুৰি কৰ’নাত আক্ৰান্ত হোৱাৰ পিছত সম্প্ৰতি মন্তব্য কৰিছে “ঘৰতেই থাকিব লাগিব বুলি কোনো কথা নাই ৷ বৰঞ্চ সতৰ্ক হৈ থাকক ৷” অথচ মৃত্যুৰ সংখ্যাৰ তালিকাত বিট্টেইনৰ স্থান তৃতীয় ৷ইপিনে সম্প্ৰতি তোলপাৰ লগাইছিল ব্ৰাজিলৰ ৰাষ্ট্ৰপতি জাইৰ’ বলছ’নাৰ’ৱে। সাংবাদিকৰ বৈঠকত জাইৰ’ৱে হঠাতে মুখৰ পৰা মাস্ক খুলি কয় তেওঁ ক’ভিড-১৯ পজিটিভ। ইয়াৰ পাছত সংবাদমাধ্যমসমূহে ব্ৰাজিলৰ ৰাষ্ট্ৰপতিজনৰ বিৰুদ্ধে আদালতলৈ যোৱাৰ ভাবুকি দিছিল ৷ ব্ৰাজিলত ইতিমধ্যে ৭৫ হেজাৰৰ অধিক লোকৰ মৃত্যু হৈছে ৷ আনহাতে মৃত্যুৰ তালিকাত ইটালীক চেৰ পেলাই মেক্সিকো চতুৰ্থ স্থানলৈ উঠি আহিছে ৷