বিশ্বজুৰি অপ্ৰতিৰোধ্য ক’ভিড-১৯ ভাইৰাছত অসম আৰক্ষীৰ বিষয়া-জোৱান আক্ৰান্তৰ সংখ্যা শুক্ৰবাৰ নিশা পৰ্যন্ত ১০৮০ জনলৈ বৃদ্ধি পালে | এক টুইট যোগে অসম আৰক্ষীৰ অতিৰিক্ত আৰক্ষী সঞ্চালক প্ৰধান (আইন-শৃংখলা) জি পি সিঙে প্ৰকাশ কৰি উল্লিখিত আক্ৰান্তৰ ৮০৫ জনেই সুস্থ হৈ উঠা বুলি উল্লেখ কৰিছে | সুস্থ হৈ উঠাসকলৰ ভিতৰত ১১০ জনে পুনৰ কৰ্মক্ষেত্ৰত যোগদান কৰা বুলি তেওঁ সদৰী কৰি বিগত দিনকেইটাত তিনজনে মৃত্যুক আঁকোৱালি লোৱা কথা প্ৰকাশ কৰিছে |
ইফালে, মহানগৰ আৰক্ষী আয়ুক্ত মুন্না প্ৰসাদ গুপ্তাই সদৰী কৰা তথ্য মতে, এই মুঠ আক্ৰান্তৰ সংখ্যা ভিতৰত ৪৮৭ জনেই মহানগৰ আৰক্ষীৰ বিষয়া-জোৱান | অৱশ্যে মহানগৰ আৰক্ষীৰ এই আক্ৰান্তৰ সংখ্যাৰ ভিতৰত ৩৩৩ জন সুস্থ হৈ উঠিল আৰু মৃত্যু হোৱা তিনজনৰ ভিতৰত দুজনেই মহানগৰ আৰক্ষী | শুকুৰবাৰৰ নিশা পৰ্যন্ত ১৫২ জন বিষয়া-জোৱান এতিয়াও চিকিৎসাধীন |