ভাৰত আৰু চীনৰ মাজত লাডাখৰ গালৱান উপত্যকাত শেহতীয়া ৰক্তাক্ত সংঘৰ্ষৰ পাছত আৰম্ভ হোৱা প্ৰকৃত নিয়ন্ত্ৰণৰেখাৰ পৰা সেনা প্ৰত্যাহাৰ অৰ্থাৎ দিছএনগেজমেণ্টৰ আলোচনা অব্যাহত থকাৰ মাজতে ভাৰতীয় সেনাই লাডাখত কুচ-কাৱাজ অব্যাহত ৰাখিছে । এই আলোচনাৰ অগ্ৰগতিৰ মাজতে লাডাখত নিযুক্তি সেনাৰ বাবে অত্যাৱশ্যকীয় সামগ্ৰী আৰু সা-সঁজুলি মজুত কৰিছে । সম্প্রতি ভাৰত-চীনৰ মাজত কালি পঞ্চমলানি আলোচনা অনুষ্ঠিত হয় । চীনক প্ৰত্যুত্তৰ দিবলৈ সাজু হৈ ভাৰতে লাডাখত প্ৰতিৰক্ষামূলক অৱস্থানত বৃহৎ সংখ্যক সেনা নিয়োগ কৰিছে ।
এই পর্যন্ত লাডাখ অঞ্চলত ভাৰতীয় বাহিনীৰ এয়া সৰ্ববৃহৎ সমাৱেশ বুলি কোৱা হৈছে। সকলো সেনাকে ভয়াবহ শীতৰ সৈতে যুঁজিব পৰাকৈ বৰ্ম দিয়া হৈছে । অহা নৱেম্বৰৰ ভিতৰত চাৰিটা বিদেশী প্ৰতিষ্ঠানে এইসমূহ সামগ্ৰী যোগান ধৰিব ধৰিব বুলি আশা কৰা হৈছে। এই মুহূৰ্তত সেনাই ৰছদ, কেৰাচিন আৰু ইন্ধন আদি মজুত কৰি আছে আৰু ই সন্তোষজনক ভাৱে আগবাঢ়িছে ।