স্তব্ধ ৰেস্তোৰাঁ ব্যৱসায়ঃকি কলে চেফ অতুল লহকৰে…
২০১৯ৰ নৱেম্বৰৰ পৰা বৰ্তমানলৈকে লোকচানৰ বোজা সহিব নোৱাৰি ৰাজ্যৰ সৰু বৰ প্ৰায় ৫০ শতাংশ হোটেল-ৰেস্তোৰাঁ সম্পূৰ্ণৰূপে বন্ধ হৈ পৰিল। এই পর্যন্ত কেৱল গুৱাহাটী মহানগৰীৰে জনপ্ৰিয় চেফ অতুল লহকৰৰ লেম্ব ৰোডস্থিত ‘হোটেল খৰিকা’, অভিনেত্ৰী নিশিতা গোস্বামীৰ গণেশগুৰিস্থিত ইচ্ছাপূৰণ, ৰণবীৰ কৌৰৰ জি এছ ৰোডক বাদ দি চাৰিখন চিক এণ্ড চিলি,ৰাজদ্বীপ গোস্বামীৰ চিৰিয়াখানা ৰোডৰ ৰেড কণ্টেমপ’ৰেৰী, দীঘলীপুখুৰীৰ ‘কুইক ইট’, নিউ তাজ হোটেলৰ সমীপৰ ‘ডাইন ৱে প্লেটজ’, বিজয় বৰুৱাৰ ‘১৬ আনা বঙালী’, আদি জনপ্ৰিয় ২০ শতাংশৰো অধিক ৰেস্তোৰাঁ তলাবন্ধৰ প্রত্যক্ষ প্ৰভাৱৰ ফলত বন্ধ হৈ পৰিছে ।
নাগৰিকত্ব সংশোধনী আইন বিৰোধী আন্দোলনৰ পৰিপ্ৰেক্ষিতত গঢ় লৈ উঠা অশান্তিকৰ পৰিৱেশৰ পাছৰে পৰা বৰ্তমানলৈকে এই ব্যৱসায় গভীৰ অনিশ্চয়তাৰ দিশে গতি কৰিছে। দীৰ্ঘদিন ধৰি উপাৰ্জন বন্ধ হৈ পৰাৰ ফলত মালিক পক্ষই বন্ধ কৰি দিব লগা হৈছে এখনৰ পিছত এখনকৈ হোটেল-ৰেস্তোৰাঁ। যুৱ প্ৰজন্মৰ হাতত ঠন ধৰি উঠা ব্যৱসায়টোৱে ৰাজ্যত কেবা লক্ষ নিবনুৱাৰ সংস্থাপনৰ পথ প্ৰশস্ত কৰিছিল যদিও সম্প্রতি সকলোৱে অনিশ্চয়তাত ভুগিছে।
উল্লেখ্য যে ৰাজ্যৰ পৰ্যটন উদ্যোগৰ লগত সামন্জ্যঞ্চ ৰাখি যোৱা ৮-৯ টা বছৰত ৰাজ্যত প্ৰায় ৫০ হেজাৰ উন্নতমানৰ হোটেল-ৰেস্তোৰাঁ গঢ় লৈ উঠিছে। গুৱাহাটী মহানগৰীতে এনে সৰু বৰ হোটেল ৰেস্তোৰাঁৰ সংখ্যা প্ৰায় ২২শ, কিন্তু যোৱা ৮-১০ মাহে এই ব্যৱসায়ত ব্যাপক ক্ষতিৰ সন্মুখীন হ’বলগীয়া হয় এই ব্যৱসায়ীসকল। সম্প্ৰতি পৰিস্থিতিৰ পৰা পৰিত্ৰাণ পাবলৈ ৰাজ্য চৰকাৰৰ সৈতে আলোচনা কৰিছে যদিও ব্যৱসায়টো জীয়াই ৰখাৰ ক্ষেত্ৰত চৰকাৰৰ সদিচ্ছাৰ অভাৱ বুলি কে’বাজনো ৰেস্তোৰাঁ ব্যৱসায়ীয়ে প্ৰকাশ কৰিছে।
‘হেৰীটেজ খৰিকাৰ স্বত্বাধিকাৰী তথা জনপ্ৰিয় চেফ অতুল লহকৰে এই সন্দৰ্ভত দৈনিক অগ্ৰদূতৰ আগত কয় যে বিশেষকৈ ঘৰৰ ভাড়াক লৈ বিপাঙত পৰিছে এই ব্যৱসায়ীসকল। মহানগৰীৰ এখন হোটেল ৰেস্তোৰাঁ আৰু বাৰসমূহে এটা ঘৰভাড়া দিবলগা হয় ৩০ হেজাৰৰ পৰা তিনিলাখ পর্যন্ত। আজি পাঁচমাহ ব্যৱসায় বন্ধ হৈ থকাৰ ফলত কি অৱস্থা হৈছে চৰকাৰে অনুধাৱন নকৰে। ঘৰৰ মহিলাসকলৰো কোনো সহযোগিতা নাই। উপায়হীন হৈ মহানগৰীৰ সৰু বৰ এনে ব্যৱসায় বন্ধ হৈ পৰিছে বুলি তেওঁ কয়।
ইফালে কোনোমতে ধাৰ-ঋণ কৰি ঘৰৰ ভাড়া দি পুনৰ ব্যৱসায় আৰম্ভ কৰা কে’বাজনো ব্যৱসায়ীয়ে এতিয়া নিজৰ নিজৰ ৰেস্তোৰাঁ বন্ধ কৰিবলৈ সাজু কৰা হৈছে বুলি উল্লেখ কৰি তেওঁ এই ক্ষেত্ৰত চৰকাৰক ব্যৱস্থা গ্ৰহণ কৰিবলৈ পুনৰ আহ্বান জনায়। খিলঞ্জীয়াৰ সুৰক্ষাৰ কথা কোৱা চৰকাৰে একো সকাহ দিব নোৱাৰিলেও ব্যৱসায়টোৰ লগত জড়িত ব্যৱসায়ীসকলৰ সৈতে বৈঠকত বহি বিষয়টো আলোচনা কৰিবলৈও সময় নাই নেকি বুলি ব্যৱসায়ীসকলে প্ৰশ্ন উত্থাপন কৰে।