নিখিল বড়ো ছাত্ৰ সন্থাৰ দীৰ্ঘদিনীয়া আন্দোলনৰ অন্তত আজি বিটিআৰ চুক্তিৰ আধাৰত মুকলি হ’ল বড়ো মাধ্যমৰ পৃথক শিক্ষা সঞ্চালকালয় । এবছুৰ উপ সভাপতি জয়ন্ত বসুমতাৰীয়ে কয় যে বিটিআৰ চুক্তিৰ প্ৰথমটো ৬.৪ নং দফাৰ বড়ো মাধ্যমৰ পৃথক শিক্ষা সঞ্চালকালয় আজি মুকলি কৰাত কেন্দ্ৰীয় চৰকাৰ আৰু ৰাজ্য চৰকাৰক ধন্যবাদ জ্ঞাপন কৰে ।
নিখিল বড়ো ছাত্ৰ সন্থা, বড়ো জাতীয় সকলো দল সংগঠন আদি একত্ৰিত হৈ আনন্দ কৰে । ইয়াৰ দ্বাৰা অসমৰ বড়ো মাধ্যমৰ এক প্ৰধান সমস্যা দূৰ হোৱা বুলিও কয় ছাত্ৰ নেতাজনে। সুকীয়া শিক্ষা সঞ্চালকালয়ৰ পিছত সকলো দফা ৰূপায়নৰ দাবী জনায় ।
হাগ্ৰামা মহিলাৰীয়ে কোৱাৰ দৰে যে বিটিআৰ চুক্তিত একো নাই । কিন্ত বিটিআৰৰ ২৩ টা জনগোষ্ঠীৰ লোকে আকোৱালি লৈছে বিটিআৰ চুক্তি আৰু ইয়াক আমি শান্তি চুক্তি বুলি কৈছিলো । ইয়াৰ দফাবোৰ আজিৰে পৰা ৰূপায়ন আৰম্ভ হ’ল । আজিৰ এই শিক্ষা সঞ্চালকালয়ৰ মুকলি অনুষ্ঠানত মন্ত্ৰী চন্দন ব্ৰহ্মও থকাৰ কথা আছিল যদিও অনুষ্ঠানত উপস্থিত নাথাকে । মুঠতে এই চুক্তিক হাগ্ৰামা মহিলাৰীয়ে নস্যাৎ কৰিলেও ইয়াত কি কি আছে আমি সকলোৱে জানো । জয়ন্ত বসুমতাৰীয়ে এনেদৰে ব্যক্ত কৰি কয় যে হাগ্ৰামাৰ কথাত কোনেও গুৰুত্ব নিদিয়ে ।
চিৰাং জিলা সদৰ কাজলগাঁওস্থিত জিলা এবছুৰ কাৰ্যালয়ত বিয়লি ৪ বজাত বড়ো শিক্ষক, বুদ্ধিজীৱি তথা অন্যান্য বিভিন্ন দল সংগঠনৰ নেতৃত্বৰ উপস্থিতিত অনুষ্ঠিত হয় এক আদৰণি সভা । তাৰপিছতে সন্ধিয়া শিক্ষক দিৱস উপলক্ষে ড° সৰ্বপল্লী ৰাধাকৃষ্ণণৰ প্ৰতিমূৰ্তিত বন্তি প্ৰজ্বলন, বডোফা উপেন্দ্ৰ নাথ ব্ৰহ্মৰ প্ৰতিমূৰ্তিত বন্তিপ্ৰজ্বলন, স্মৃতি তৰ্পন আৰু বড়ো মাধ্যমৰ পৃথক শিক্ষা সঞ্চালকালয়ক আদৰণি ফটকা ফুটাই আনন্দোৎসৱ উদযাপন কৰে ।
চিৰাং জিলা এবছুৰ সভাপতি খনিন্দ্ৰ বসুমতাৰীকে ধৰি জিলাখনৰ বহুকেইটা বড়ো জাতীয় সংগঠনৰ সহস্ৰাধিক লোকে কাজলগাঁওৰ এই আনন্দ উৎসৱত অংশগ্ৰহণ কৰে ।