কলিয়াবৰত চৰকাৰী আঁচনি ঘোষণা মানেই যেন একাংশ নেতা-পালিনেতা, পঞ্চায়ত প্ৰতিনিধিৰ ধনৰ উজান ৷ দৰিদ্ৰৰ আশা-আকাংক্ষালৈ পিঠি দি মাথোঁ নিজৰ স্বাৰ্থ পূৰণত ব্যস্ত হৈ পৰিছে তথাকথিত ৰাইজৰ সেৱক ৷ শেহতীয়াকৈ কলিয়াবৰ উন্নয়ন খণ্ডৰ লগতে পশ্চিম কলিয়াবৰ উন্নয়ন খণ্ড এলেকাৰ অন্তৰ্গত বহুকেইটা পঞ্চায়তত চৰকাৰে ঘোষণা কৰা অৰুণোদয় আঁচনিৰ নামত একাংশ নেতা-পালিনেতা, পঞ্চায়ত প্ৰতিনিধিয়ে দৰিদ্ৰক আঁচনি দিয়াৰ প্ৰচাৰৰে ব্যাপক হাৰত ধন সংগ্ৰহ কৰাৰ অভিযোগ আহি পৰিছে ৷
এগৰাকী দৰিদ্ৰ সীমাৰেখাৰ তলৰ ব্যক্তিক এই অৰুণোদয় আঁচনিৰ ধন প্ৰদানৰ প্ৰতিশ্ৰুতিৰে একাংশ জনপ্ৰতিনিধি, নেতা-পালিনেতাই দুশৰ পৰা একহাজাৰ পৰ্যন্ত ধন দাবী কৰি লোৱাৰ অভিযোগ উঠিছে৷ ইয়াৰ মাজতে আজি কলিয়াবৰৰ পশ্চিম কলিয়াবৰ উন্নয়ন খণ্ড এলেকাৰ ৰহধলা গাঁও পঞ্চায়তত অৰুণোদয় আঁচনিৰ নামত ধন দাবী আৰু ধন সংগ্ৰহক লৈ সৃষ্টি হয় উত্তপ্ত পৰিস্থিতিৰ ৷
কলিয়াবৰৰ ৰহঢলা গাঁও পঞ্চায়তৰ একাংশ সচেতন লোকে সৃষ্টি কৰে এই উত্তপ্ত পৰিস্থিতিৰ । অৰুণোদয় আচঁনিৰ বাবে ধন সংগ্ৰহ কৰাক লৈ উত্তপ্ত পৰিস্থিতিৰ সৃষ্টি কৰি ৰহঢলা গাঁও পঞ্চায়তৰ দহ নং ৱাৰ্ডৰ পঞ্চায়তৰ সদস্য চম্পাৰাণী দাসে ধন সংগ্ৰহ কৰাক লৈ উত্তেজিত জনতাই ঘেৰাও কৰে সদস্যাগৰাকীৰ বাসগৃহ । প্ৰায় দুই শতাধিক জনতাই চম্পাৰাণী দাস মু্ৰ্দাবাদ ধ্বনি দি উত্তাল কৰি তোলে সমগ্ৰ পৰিবেশ ।
উল্লেখ্য যে, পঞ্চায়ত কাৰ্যালয়ত কোনো জন প্ৰতিনিধি নাপায় প্ৰায় এক কিলোমিটাৰ পথ খোজ কাঢ়ি গৈ পঞ্চায়তৰ সদস্যাগৰাকীৰ বাসগৃহটো ঘেৰাও কৰি প্ৰতিবাদ সাব্যস্ত কৰে জনসাধাৰণে। ইফালে ৰাইজৰ ৰুদ্ৰমূৰ্তি দেখি পঞ্চায়ত সদস্যাগৰাকীয়ে ৰাইজৰ ৰোষত পৰাৰ ভয়ত পলায়ন কৰে নিজ বাসগৃহৰ পৰা ৷ এয়া মাঁথো এক উদাহৰণহে ৷ কলিয়াবৰৰ দুয়োটা উন্নয়ন খণ্ড এলেকাৰ বহুকেইটা পঞ্চায়তত এতিয়া এনে আঁচনিৰ নামত জনপ্ৰতিনিধিয়ে ধন সংগ্ৰহ কৰাক লৈ প্ৰতিবাদমূখৰ হৈ পৰিছে ৰাইজ ৷
