অসম মিজোৰামৰ সীমান্তৰ বুজ ল’বলৈ আজি সীমান্তৱৰ্তী এলেকা খুলিচৰা আৰু লায়লাপুৰত আজি উপস্থিত হয় অসম আৰক্ষীৰ এডিজিপি জি পি সিং । আৰক্ষী বিষয়াজনে প্ৰথমে খুলিচৰাৰ মিজো দুষ্কৃতিকাৰীয়ে বোমা বিস্ফোৰণ ঘটোৱা বিদ্যালয়ত উপস্থিত হৈ পৰিস্থিতিৰ বুজ লয় ৷
তাৰপিছত মিজোৰামৰ ভাইৰেন্টি হৈ লায়লাপুৰৰ পৰিস্থিতিৰ বুজ লৈ কয় যে ‘বোমা বিস্ফোৰণ সংঘটিত কৰা বিদ্যালয়ৰ তদন্তৰ দায়িত্ব কেন্দ্ৰীয় তদন্তকাৰী সংস্থাক দিয়া হ’ব ৷ এই সন্দৰ্ভত উচ্চবিষয়া সকলৰ স’তে আলোচনা হৈছে ৷’
ইপিনে, মিজো সকলৰ তাণ্ডৱত অতিষ্ঠ হৈ আজি পুনৰ অনিৰ্দিষ্ট কালৰ বাবে পথ অৱৰোধ কৰিলে কাছাৰ জিলাৰ লায়লাপুৰৰ ৰাইজে ৷ আজি পুৱাৰে পৰা লায়লাপুৰত পথ অৱৰোধ কৰি মিজোৰাম অভিমুখী সকলো যানবাহন পথত আৱদ্ধ কৰি ৰাখিছে অসম মিজোৰাম সীমান্তৱৰ্তী লায়লাপুৰৰ উত্তেজিত ৰাইজে ৷
তেওঁলোকৰ দাবী যেতিয়ালৈকে মিজো সকলে অসমৰ ভূমি এৰি নাযায় তেতিয়ালৈকে মিজোৰামৰ বিৰুদ্ধে এই অৰ্থনৈতিক অৱৰোধ চলি থাকিব ৷ তেওঁলোকে লগতে কয় যে যোৱা ২১ অক্টোবৰত অসম-মিজোৰামৰ গৃহ সচিব পৰ্যায়ৰ এখন বৈঠক হোৱাৰ পিছত মিজোৰামে অসমৰ ভূমি এৰি যোৱাৰ কথা আছিল ।
কিন্তু তাৰ বিপৰীতে অসমৰ এখন বিদ্যালয়হে জ্বলাই দিয়ে । ইয়াৰ উপৰিও এই অৱৰোধ তীব্ৰতৰ কৰি তুলাৰ দাবীত উত্তেজিত ৰাইজে বিভিন্ন দল-সংগঠনক সহযোগ কৰাৰ বাবে আহ্বান জনায় ।