ধৰ্মীয় আবেগক আঘাত দিয়াৰ অভিযোগত বিজেপিৰ ৰোষত পৰিল অমিতাভ বচ্চন। মঙলবাৰে অমিতাভ বচ্চনৰ বিৰুদ্ধে এফআইআৰ দাখিল কৰে মহাৰাষ্ট্ৰৰ বিজেপি বিধায়ক অভিমন্যু পৌৱাৰে ।
অভিমন্যুৱে দাবী কৰা মতে, টেলিভিছনৰ কৌন বনেগা কৰৌড়পতিৰ এটা খণ্ডত হিন্দু ধৰ্মৰ ভাবাবেগত আঘাত দিয়া হৈছে। ইয়াৰ উপৰিও লোকজনক অপমান কৰাৰ চেষ্টা কৰা হৈছে । হিন্দু আৰু বৌদ্ধ ধৰ্মীয় লোকৰ মাজত বিভেদ সৃষ্টি কৰিব বিচাৰিছে। অমিতাভৰ বাহিৰেও অভিমন্যুৱে শ্ব’টোৰ নিৰ্মাতা ছ’নী এণ্টাৰটেইনমেইণ্ট টেলিভিছনৰ ওপৰতো অভিযোগ উত্থাপন কৰে ।
আনহাতে, বিজেপিৰ নেতাজনে তেওঁলোকৰ বিৰুদ্ধে বিহিত ব্যৱস্থা ল’বলৈ আৰক্ষীক অনুৰোধ জনাইছে ।
অভিযোগ উত্থাপন কৰা কৌন বনেগা কৰৌড়পতিৰ সেই খণ্ডটোৰ অতিথি আছিল সামাজিক কাৰ্যকর্তা বেজবাড়া বিলছন আৰু অভিনেতা অনুপ চ’নী । তেওঁলোকৰ প্ৰতি অমিতাভৰ প্ৰশ্ন আছিল যে, ১৯২৭ৰ ২৫ ডিচেম্বৰত বিআৰ আম্বেদকাৰ আৰু তেঁওৰ অনুগামী সকলে কোনখন কিতাপ জ্বলাই দিছিল ? ৬ লাখ ৪০ হেজাৰ টকাৰ এই প্ৰশ্নটোৰ উত্তৰ দিছিল ৪ টা – (ক) বিষ্ণুপুৰাণ (খ) ভাগৱত গীতা (গ) ঋকবেদ আৰু (ঘ) মনোস্মৃতি ।
উক্ত প্ৰশ্নৰ উত্তৰ নোপোৱাত অমিতাভে কয়, ১৯২৭ ত হিন্দু গ্ৰন্থ মনোস্মৃতিৰ নিন্দা কৰিছিল আম্বেদকাৰে । অমিতাভৰ এই বাখ্যাত ক্ষোভিত প্ৰকাশ কৰিছে বিজেপি নেতাজনে। তেঁওৰ দাবী চাৰিটা অপ্সন হিন্দু ধৰ্ম সম্পৰ্কীয় । এই কথা স্পষ্ট যে, হিন্দু ধৰ্মৰ ভাবাবেগত আঘাত দিয়াই আছিল এই প্ৰশ্ন উত্থাপনৰ প্ৰকৃত উদ্দেশ্য ।