মানাহ ৰাষ্ট্ৰীয় উদ্যানৰ সমীপৱৰ্তী তথা বাক্সা জিলাৰ শালবাৰীৰ ফাতেমাবাদ চাহ বাগিচাত আজি বিয়লি সংঘটিত হোৱা এক পথ দুৰ্ঘটনাত এজন যুৱক থিতাতে নিহত হয়৷ নিহত যুৱকজন শালবাৰীৰ বাঁহবাৰী আৰক্ষী চকীৰ অন্তৰ্গত ৰাঘবিলৰ জ্ঞাতি গাঁৱৰ লংকু দাস(৩৫)৷
মানাহৰ ফাতেমাবাদ চাহ বাগিচাৰ সমীপত আজি বিয়লি ভাগত AS 25BC 6642 নম্বৰৰ বিস্কুট কঢ়িয়াই অনা মেজিক গাড়ীখনৰ লগত AS 15 Q 3427 নম্বৰৰ পালছাৰ বাইকখনৰ মুখামুখি সংঘৰ্ষ হয়৷ সংঘৰ্ষত বাইক আৰোহী জ্ঞাতিগাঁৱৰ গিৰীশ দাসৰ পুত্ৰ লংকু দাস থিতাতে নিহত হয়৷
ইয়াৰ পাছত ততাতৈয়াকৈ ঘটনাস্থলীত আৰক্ষীৰ লোক উপস্থিত হৈ মৃতদেহটো উদ্ধাৰ কৰাৰ লগতে ঘটনা সংঘটিত কৰা বাহন দুখন জব্দ কৰে৷ আনহাতে সাপ্তাহিক বাগান বজাৰৰ পথছোৱাত সংঘটিত হোৱা দুৰ্ঘটনাটো গতিৰোধক নথকাৰ বাবেই সংঘটিত হয় বুলি স্থানীয় লোকে জানিবলৈ দিয়ে৷ উল্লেখ্য যে নিহত লিংকু দাস প্ৰায় দুমাহ পূৰ্বেহে বিবাহপাশত আৱদ্ধ হৈছিল৷