প্ৰথমবাৰ বিয়াত বহাৰ সময়ত যিকোনো পুৰুষ-মহিলাৰ মাজতে অভূতপূৰ্ব উত্তেজনাৰ সৃষ্টি হয়; কিন্তু বিয়াৰ পৰৱৰ্তী সময়ত সেই উত্তেজনা কেতিয়া নোহোৱা হৈ যায় কোনেও গমকে ধৰিব নোৱাৰে। দ্বিতীয় বিয়াৰ কথা ক’লে আকৌ বহুতৰে জ্ঞান হেৰুৱাবলগীয়া পৰিস্থিতিৰ সৃষ্টি হয়। সেয়েহে হয়তো কথাতে কোৱা হয় ‘পাগলেও বেলৰ তললৈ এবাৰে যায় ।’ কিন্তু পাকিস্তানৰ এজন লোক বিবাহৰ বাবেই সম্প্ৰতি আলোচনাৰ কেন্দ্ৰ বিন্দুলৈ আহিছে । এই লোকজনে সম্প্ৰতি এবাৰ-দুবাৰ নহয় চতুৰ্থবাৰলৈ বিয়াত বহিবলৈ আগবাঢ়িছে ।
সবাতোকৈ আচৰিত হ’ব লগা কথাতো হ’ল নতুন কইনা বিচৰাত লোকজনক নিজৰ তিনি পত্নীয়ে পূৰ্ণ সহায় আগবঢ়াইছে। পাকিস্তানৰ শিয়ালকোটৰ এই বাসিন্দাজনৰ নাম আদনান । প্ৰথমবাৰ মাত্ৰ ১৬ বছৰ বয়সতে আদনানে বিয়াত বহিছিল । সেই সময়ত অধ্যয়নত ব্যস্ত আছিল আদনান । পত্নীৰ লগত অতি আনন্দৰেই দিন পাৰ হৈছিল আদনানৰ; কিন্তু প্ৰথম বিবাহৰ চাৰিটা বছৰ পাৰ নৌহওঁতেই দ্বিতীয় বিবাহৰ কথা ভাবিবলৈ লয় আদনানে । তেনেদৰে ভাবিলে তেনেদৰে বিবাহ সম্পন্নও কৰিলে । শ্বাবান নামৰ এগৰাকী যুৱতীক দ্বিতীয় পত্নী কৰি লয় আদনানে । যোৱা বছৰ তৃতীয়খন বিয়াত বহে আদনান । তৃতীয় পত্নীৰ নাম শাহিদা।
বৰ্তমান পাঁচটি সন্তানৰ পিতৃ হৈছে আদনান । প্ৰথম পত্নীৰ তিনি সন্তান । দ্বিতীয় পত্নী এটি সন্তানৰ মাতৃ । আনহাতে দ্বিতীয় পত্নীৰে আলোচনা কৰি এটি শিশুক ‘তুলি’ লৈছে। তৃতীয় পত্নী এতিয়াও মাতৃ হোৱাগৈ নাই । চতুৰ্থ পত্নীৰ বাবে আদনানৰ চৰ্ত হ’ল নামৰ প্ৰথম আখৰটো ‘স’ অথবা ‘শ’ হ’ব লাগিব । ইয়াৰ বাহিৰে চতুৰ্থ পত্নীৰ সন্ধান চলোৱাত আন কোনো দাবী নাই আদনানৰ । তিনি পত্নীয়ে এতিয়া স্বামীৰ মন বুজিয়ে নতুন সতিনীৰ সন্ধানত নামি পৰিছে ।
আদনানৰ দাম্পত্য জীৱনৰ কাহিনীয়ে যিকোনো লোককে অবাক কৰি তুলিছে। বহুতৰ মনত আকৌ প্ৰশ্নৰ উদয় হৈছে – আদনানে বাৰু কিদৰে তিনি পত্নীক নিয়ন্ত্ৰণত কৰে । আদনানে অৱশ্যে এই ক্ষেত্ৰত নিজকে সৌভাগ্যবান বুলি অনুভৱ কৰে । আদনানে একেটা ঘৰতে তিনি পত্নীৰ স’তে সম্প্ৰতি বসবাস কৰি আছে । তিনি পত্নীৰ মাজত দ্বন্দ-খৰিয়াল হোৱাও চুবুৰীয়া কোনো লোকে এতিয়ালৈ দেখা নাই । তিনিও পত্নীৰ মাজত যথেষ্ট মিল থকা হে সকলোৱে দেখি আহিছে।
অৱশ্যে স্বামীয়ে তেওঁলোকক প্ৰয়োজন অনুসৰি সময় নিদিয়ে বুলি সঘনাই অভিযোগ কৰি আহিছে। চতুৰ্থ পত্নীক নিজৰ সংগী কৰি লোৱাৰ বাবেও তিনি পত্নী প্ৰস্তুত হৈ আছে। বহুতেই আকৌ আদনানৰ দৰে কপাল কিয় লাভ নকৰিলে সেই কথা ভাবি পাৰ নোপোৱা হৈছে। অৱশ্যে আদনানৰ কাহিনীয়ে বহুতকে বিৰক্তও কৰিছে ।