আজি খানাপাৰাস্থিত পশু চিকিৎসা বিজ্ঞান মহাবিদ্যালয়ৰ প্ৰেক্ষাগৃহত পশুপালন আৰু পশু চিকিৎসা বিভাগত ২২১গৰাকী ক্ষেত্ৰ সহায়কৰ পদৰ নিযুক্তিপত্ৰ বিতৰণ কৰা হয় । নিযুক্তি পত্ৰ বিতৰণ কৰি বিভাগীয় মন্ত্ৰী অতুল বৰাই কয় যে ক্ষেত্ৰ সহায়ক সকলৰ নিযুক্তিয়ে বিভাগৰ বহুদিনীয়া অভাৱ এটা পুৰণ কৰিলে । ক্ষেত্ৰ সহায়ক সকলক সেৱাৰ মনোভাৱেৰে ৰাজ্যখনৰ জনসাধাৰণৰ স্বাৰ্থত কাম কৰি যাবলৈ আহ্বান জনায় মন্ত্ৰী গৰাকীয়ে ।
ক্ষেত্ৰ সহায়ক সকলৰ দায়িত্ব অপৰিসীম বুলি মন্ত্ৰী বৰাই কয় যে বিভাগটোক গতি দিয়াত ক্ষেত্ৰ সহায়ক সকলে বিশেষ ভুমিকা গ্ৰহণ কৰিব পাৰে । পশুপালক সকলৰ সুখ দুখৰ সময়চোৱাত কাষতে থাকি বিভাগটোক উজ্জীৱিত কৰাৰ লগতে উৎপাদন বৃদ্ধিত গুৰুত্বপুৰ্ণ ভূমিকা গ্ৰহন কৰিবলৈ মন্ত্ৰী গৰাকীয়ে আহ্বান জনায় । অনুষ্ঠানত পশুধন নিগমৰ অধ্যক্ষ মনোজ শইকীয়াই ক্ষেত্ৰ সহায়ক সকলক বিভিন্ন সমস্যাৰ মাজতো ত্যাগ আৰু ধৈৰ্য্য সহকাৰে কাম কৰাত গুৰুত্ব দিয়ে ।
ৰাজ্যৰ অৰ্থনৈতিক স্বাৱলম্বীকৰণত ক্ষেত্ৰ সহায়ক সকলে পৰিৱেশ ৰচনা কৰিব লাগিব বুলি শইকীয়াই মন্তৱ্য প্ৰকাশ কৰে । এই অনুষ্ঠানত বিভাগৰ আয়উক্ত সচিব শ্যাম জগন্নাথন , সচিব ৰবিনচন মুছাহাৰী , সঞ্চালক অশোক বৰ্মন ,পশু চিকিৎসা বিজ্ঞান মহাবিদ্যালয়ৰ বিজ্ঞান গুৰু বিবেকানন্দ শইকীয়া , দুগ্ধ উন্নয়নৰ সঞ্চালক উৎপল শৰ্মা প্ৰমুখ্যে বিভাগীয় বিষয়া সকল উপস্থিত থাকে ।