চিৰাং জিলাৰ অতিকে ভিতৰুৱা অঞ্চল বেংতল শালবাৰী গাঁৱৰ শিক্ষিত যুৱক অমৰসিং বসুমতাৰী । স্নাতকৰ মহলা উত্তীৰ্ণ হৈ চাকৰীৰ পিছত দৌৰি নুফুৰি আৰম্ভ কৰিছে কৃষি কৰ্ম।কলেজত পঢ়ি থকা সময়ৰ পৰাই কৃষি কৰ্মৰ প্ৰতি ধাউতি আছিল অমৰৰ। কলেজীয়া শিক্ষা সাং কৰি উদালগুৰীৰ পৰা ষ্ট্ৰবেৰী খেতিৰ শিক্ষা লয় আৰু ইউটিউবৰ পৰাও কিছু শিকে।তাৰ পিছতে হিমাচলত থকা বন্ধুৰ স’তে যোগাযোগ কৰি ষ্ট্ৰবেৰীৰ পুলি আনি তিনিবিঘা মাটীত খেতি কৰে।
যোৱা বছৰ লক ডাউনৰ বাবে বিপাঙত পৰিছিল যদিও লোকচান হোৱা নাছিল।অমৰ সিঙে জনায় যে প্ৰতি বিঘা ষ্ট্ৰবেৰী খেতিত ৭০ৰ পৰা ৮০ হেজাৰ টকা খৰচ হয় যদিও বিঘাই প্ৰতি ৫ৰ পৰা ৬ লাখ টকা আয় হয়। এই ক্ষেত্ৰত কৃষি বিভাগে বিভিন্ন দিশত পৰামৰ্শ দিয়াৰ লগতে তেওঁক সহায়ো কৰে।তেওঁ নিজে এই কৃষি কৰ্মৰে স্বাৱলম্বি হোৱাৰ লগতে নিজৰ খেতিত গাঁৱৰ বহু লোকক কৰ্ম সংস্থাপন দিবলৈ সক্ষম হৈছে বুলিও জনায় ।
ষ্ট্ৰবেৰী খেতিৰ মাজতে তেওঁ ঘৰত খোৱাৰ বাবে পাচলিও কৰিছে।অমৰ সিঙৰ কৃষিত সাফল্য দেখি আপ্লুত বিটিচিৰ কৃষি বিভাগৰ সঞ্চালক কনক ৰায়। তেওঁ কয় যে এয়া সচাকৈ অসমৰ কৃষি বিভাগৰ বাবে ভাল খবৰ। শিক্ষিত যুৱক সকল কৃষিৰ বাবে আগবাঢ়ি আহি সফলতা লাভ কৰিবলৈ সক্ষম হৈছে।যিসকল নতুনকৈ খেতি কৰিব বিচাৰে তেওঁ লোকক বিভাগীয় ভাৱে সকলো সহায় কৰাৰ প্ৰতিশ্ৰুতি দিয়ে কনক ৰায়ে ।
শিক্ষিত যুৱক যুৱতি যিসকলে কৃষি কৰ্মৰ প্ৰতি আগ্ৰহি তেওঁ লোক আগবাঢ়ি আহিলে অমৰ সিঙে সহায় কৰিব বুলিও জনায় আৰু একেদৰেই কৃষি বিভাগেও সহায় কৰিব বুলি জনায়।মুঠতে ৰাজ্যত কৃষি বিপ্লৱৰ বাবে শিক্ষিত যুৱক যুৱতি সকলক নিয়োজিত কৰাৰ বাবে বৰ্তমান চৰকাৰে ও বিভিন্ন ধৰণৰ সহায় কৰাৰ আঁচনি প্ৰস্থুত কৰিছে । মাথো যুৱক যুৱতি সকলৰ আগবাঢ়ি অহালৈহে অপেক্ষা।