এখন পথাৰত থিয় হৈ আছে এখন অটোৰিক্সা । এই অটোখনৰ ওপৰতে আছে এটা ঘৰ । সেই ঘৰটো আকাৰত সৰু হ’লেও বসবাসৰ বাবে প্ৰয়োজনীয় সকলো ব্যৱস্থাই তাত আছে এই ধৰণৰ ভ্ৰাম্যমাণ বাসগৃহৰ একাংশ ফটো সম্প্ৰতি নিজৰ টুইটাৰ হেণ্ডেলত শ্বেয়াৰ কৰিছে উদ্যোগপতি আনন্দ মহিন্দ্ৰাই । ইয়াৰ পাছতে এই অভিনৱ বাসগৃহটোক লৈ ব্যাপক চৰ্চা হৈছে সামাজিক মাধ্যমত ।
এই অভিনৱ ঘৰটোৰ ফটো প’ষ্ট কৰি মাহিন্দ্ৰাই লিখিছে, ‘সামান্য স্থানৰ ক্ষমতা বুজাবলৈকে অৰুণে এই কাম কৰিছে । কিন্তু এই সৃষ্টিয়ে এটা ডাঙৰ প্ৰৱণতাকো দাঙি ধৰিছে । ক’ভিড পৰৱৰ্তী সময়ত ভ্ৰাম্যমান হৈ থকাৰ ইচ্ছাপূৰণ কৰাত সক্ষম এই গৃহটো ।’
স্থপতিবিদ প্ৰভুৰ স’তে কোনোবাই তেওঁক যোগাযোগ কৰি দিব পাৰিব নেকি বুলিও মহিন্দ্ৰাই সামাজিক মাধ্যমকাৰীক আহ্বান জনাইছে । এই ধৰণৰ বাসগৃহ বলেৰ’ পিকআপ ভানৰ ওপৰত প্ৰভুৱে নিৰ্মাণ কৰিব পাৰিব নেকি বুলিও তেওঁ জানিব বিচাৰিছে ।