চীনৰ ধনকুবেৰ জেক মাৰ সংস্থা আলিবাবাই এশ কোটি মাৰ্কিন ডলাৰ (ভাৰতীয় মুদ্ৰাত প্ৰায় সাত হেজাৰ ২৭১ কোটি টকাৰো অধিক) জৰিমনা দিবলগীয়া হ’ব পাৰে । ছি জিনপিং প্ৰশাসনে বিগত কেইমাহত আলিবাবাৰ নিয়ন্ত্ৰণত থকা সংস্থা ‘এণ্ট গ্ৰুপ ক’ নিজৰ অধীনলৈ আনি বজাৰত সংস্থাটোৰ শ্বেয়াৰ বন্ধ কৰি দিয়ে ।
আন্তৰ্জাতিক সংবাদ মাধ্যমৰ সূত্ৰ অনুসৰি, এইবাৰ চীনৰ সংস্থাই ভৰিব লগা হ’ব পাৰে বিপুল পৰিমাণৰ জৰিমনা । ইতিমধ্যে জৰিমনা সন্দৰ্ভত চীনৰ প্ৰশাসনে কোনো প্ৰতিক্ৰিয়া দিয়া নাই ।
২০১৫ত ক’ৱালক’মৰ বিৰুদ্ধে এই ধৰণৰে অভিযোগ উত্থাপন কৰিছিল চীনে । সেই সংস্থাৰ জৰিমনাৰ পৰিমাণ আছিল ৯৭ কোটি ডলাৰৰো অধিক ।
চীনৰ বাণিজ্য নিয়ন্ত্ৰক সংস্থাই বাণিজ্যিক সংস্থাবোৰৰ ওপৰত জৰিমনাৰ লগতে একাধিক বিধিনিষেধ জাৰি কৰাৰ সম্ভৱনা আছে । আলিবাবাৰ কিছু পৰিমাণৰ সম্পদৰ পৰা মালিকীস্বত্ব খৰ্ব কৰাৰো সম্ভাৱনা আছে ।
চীনৰ প্ৰশাসনে জনায় যে, আলিবাবাৰ বিৰূদ্ধে বিশ্বাসভংগৰ ভিত্তিত তদন্ত আৰম্ভ কৰিব ছি জিনপিং চৰকাৰ । ইয়াৰ পূৰ্বে চীনৰ বাণিজ্য নিয়ন্ত্ৰণ নীতিক লৈ সমালোচনা কৰিছিল আলিবাবাৰ মুৰব্বী জেক মাই ।