অসম বিধানসভা নিৰ্বাচনৰ তৃতীয় পৰ্য্যায়ৰ নিৰ্বাচনৰ মনোনয়ন পত্ৰ দাখিল কৰাৰ পাছতে ৰাজনৈতিক দলসমূহৰ তৎপৰতা বৃদ্ধি হৈছে । কিছুসংখ্যকে নিৰ্বাচনী কাৰ্য্যালয় মুকলি কৰাৰ সময়তে কিছুসংখ্যকে নিৰ্বাচনী প্ৰচাৰ সভা অনুষ্ঠিত কৰিছে । এই ক্ষেত্ৰত পিছ পৰি থকা নাই হাগ্ৰামা মহিলাৰীৰ বিপিএফ দলেও ।
আজি অসম বিধাানসভা সমষ্টিৰ ২৯নং কোকৰাঝাৰ পশ্চিম জনজাতি সমষ্টিৰ অধীনস্থ সেৰফানগুৰী, নেপালপাৰা, ৰমনীআশ্ৰম আদি অঞ্চলত নিৰ্বাচন পৰিচালনা কৰিবলৈ নিৰ্বাচনী উপ-কাৰ্যালয়সমূহৰ আনুষ্ঠানিকভাৱে উদ্বোধন কৰে বিপিএফ দলৰ প্ৰাৰ্থী তথা বিধায়ক ৰবিৰাম নাৰ্জাৰীয়ে । অনুষ্ঠানখনত বিধায়ক তথা বিপিএফ দলৰ প্ৰাৰ্থী জন উপস্থিত হোৱাৰ লগে লগেই দলীয় সমৰ্থকসকলে ঢোলে-ডগৰে আয়তিয়ে উৰুলি দি নৃত্যৰে তেওঁক আদৰণি জনায় ।
সেৰফাংগুৰী নিৰ্বাচনী কাৰ্যালয়ৰ উদ্বোধনী অনুষ্ঠানৰ কাৰ্য্যসূচী অনুসৰি পুৱা বিপিএফৰ দলীয় পতাকা উদ্বোধন কৰি অনুষ্ঠানৰ আৰম্ভ কৰে সেৰফাংগুৰী প্ৰাইমাৰী বিপিএফৰ সভাপতি সম্পাদক সৌৰাং নাৰ্জাৰী আৰু সৌৰাং ব্ৰহ্মই । ইয়াৰ পাছত কে’বাশতাধিক সমৰ্থকৰ লগতে জ্যেষ্ঠ নাগৰিকসকলৰ উপস্থিতিতেই ফিতা কাটি কাৰ্য্যালয়টো উদ্বোধন কৰে প্ৰাৰ্থী নাৰ্জাৰীয়ে ।
কাৰ্য্যালয়টো উদ্বোধনৰ লগতে এক নিৰ্বাচনী প্ৰচাৰ সভাও অনুষ্ঠিত কৰে । উক্ত নিৰ্বাচনী প্ৰচাৰ সভাত সেৰফাংগুৰী অঞ্চলৰ জ্যেষ্ঠ ব্যক্তি মদাৰাম নাৰ্জাৰীৰসহ বকুল ব্ৰহ্ম, আজগৰ আলী, এমচিএল এ প্ৰকাশ বসুমাতাৰীও উপস্থিত থাকি বিপিএফ দলক ভোট প্ৰদান কৰিবলৈ আহ্বান জনায় ।
আজিৰ দিনটোতে ইপিনে ৩০ নং কোকৰাঝাৰ জনজাতি সমষ্টিৰ ৰামফলবিল , শিয়ালমাৰী, গৈজন পুৰি আদি অঞ্চলত দোতমা সমষ্টিৰ এমচিএল এ প্ৰকাশ বসুমাতাৰীয়ে নিৰ্বাচনী প্ৰচাৰ কাৰ্য্যালয়ৰ উদ্বোধন কৰে ।