অক্সফ’ৰ্ড-অষ্ট্ৰাজেনেকাৰ প্ৰতিষেধক ৰপ্তানি সাময়িকভাৱে বন্ধ ৰাখিছে ভাৰতে । দেশত কৰ’না দ্বিতীয় ঢৌ অহাৰ পাছতেই এই সিদ্ধান্ত গ্ৰহণ কৰিছে প্ৰধানমন্ত্ৰী নৰেন্দ্ৰ মোদীয়ে । ভাৰতৰ ছেৰাম ইনষ্টিটিউটত অক্সফ’ৰ্ড-অষ্ট্ৰাজেনেকাৰ প্ৰতিষেধক প্ৰস্তুত কৰা হয় । এইটো বিশ্বৰ বৃহত্তম প্ৰতিষেধক প্ৰস্তুতকাৰী সংস্থা । সমগ্ৰ বিশ্বত ছেৰামৰ প্ৰতিষেধক ৰপ্তানি কৰা হয় । দেশত সংক্ৰমণ বৃদ্ধি পোৱাৰ ফলত প্ৰতিষেধকৰ চাহিদা বৃদ্ধি পোৱাৰ বাবে বৃহৎ সংখ্যাত ৰপ্তানি বন্ধ কৰিছে ভাৰতে ।
বিশ্ব স্বাস্থ্য সংস্থাৰ নিয়ন্ত্ৰণাধীন ক’ভিক্স প্ৰতিষেধক সৰবৰাহৰ ক্ষেত্ৰতো ইয়াৰ প্ৰভাৱ পৰিব । বিশ্বৰ ৬৪খন নিম্ন আয়ৰ দেশত প্ৰতিষেধক সৰবৰাহ কৰাৰ সিদ্ধান্ত গ্ৰহণ কৰিছে বিশ্ব স্বাস্থ্য সংস্থাই । ইতিমধ্যে ক’ভিক্স সংগঠনে ছেৰামৰ এক কোটি ৭০ লাখ কৰ’না প্ৰতিষেধক লাভ কৰিছে । অৱশ্যে সম্প্ৰতি এই সৰবৰাহ স্থগিত ৰখা হৈছে ।
বিশ্ব স্বাস্থ্য সংস্থাই জনায়, ‘ৰপ্তানিৰ অনুমতি লাভ নকৰাৰ বাবে নিম্ন আয়ৰ দেশসমূহত কৰ’নাৰ প্ৰতিষেক সৰবৰাহ কৰাত সাময়িক পলম হ’ব পাৰে । ছেৰাম ইনষ্টিটিউটে মাৰ্চ আৰু এপ্ৰিলত ৰপ্তানি কৰিবলগীয়া প্ৰতিষেধকসমূহ সামান্য পলমকৈয়ে লাভ কৰিব ।’
There are enough vaccines in our country for all eligible beneficiaries. So, do not believe in rumours, and #Unite2FightCorona by participating in the #LargestVaccineDrive. pic.twitter.com/fW1Ck5pXv7
— Ministry of Health (@MoHFW_INDIA) March 25, 2021
চৰকাৰী সূত্ৰ অনুসৰি, যোৱা বৃহস্পতিবাৰৰ পৰা প্ৰতিষেধক ৰপ্তানি কৰা হোৱা নাই । কেন্দ্ৰীয় চৰকাৰৰ এজন বিষয়াই সংবাদ মাধ্যমক জনায়, ‘সকলোৱছ এখোঁজ পিছুৱাই গৈছে । স্থায়ীভাৱে নহ’লেও সাময়িকভাৱে ।’ বিশ্ব স্বাস্থ্য সংস্থাই আশ্বাস দিছে যে, ভাৰত চৰকাৰে অতি শীঘ্ৰে এই সমস্যা সমাধান কৰি ৰপ্তানি আৰম্ভ কৰিব ।
অক্সফ’ৰ্ডৰ প্ৰতিষেধকৰ এক বিশেষ প্ৰতিবেদন প্ৰকাশ পাইছে আমেৰিকাত । প্ৰতিবেদন অনুসৰি, প্ৰতিষেধকটো মানৱ শৰীৰত ৭৬ শতাংশ কাৰ্যকৰী । ইয়াৰ পূৰ্বে ফেব্ৰুৱাৰীত এটা পৰীক্ষামূলক প্ৰয়োগৰ ভিত্তিত নিৰ্মিত প্ৰতিবেদনত কোৱা হৈছিল যে, কৰ’না ভাইৰাছ প্ৰতিৰোধ কৰাত প্ৰতিষেধকটো ৭৯ শতাংশ কাৰ্যকৰী । ৩২ হেজাৰৰো অধিক লোকৰ শৰীৰত প্ৰতিষেধক প্ৰয়োগ কৰি এই প্ৰতিবেদন প্ৰস্তুত কৰা হৈছে ।