তলাবন্ধৰ পৰিৱৰ্তে কঠোৰ ‘জনতা কাৰ্ফিউ’ জাৰি কৰা হৈছে মহাৰাষ্ট্ৰত । কালি এই সিদ্ধান্তৰ বিষয়ে প্ৰশাসনক অৱগত কৰে মুখ্যমন্ত্ৰী উদ্ধৱ ঠাকৰেই । ১৪ এপ্ৰিলৰ নিশা আঠটাৰ পৰা এক মে’ পুৱা সাতটা পৰ্যন্ত এই কাৰ্ফিউ অব্যাহত থাকিব । কালি নিশাই মুখ্যমন্ত্ৰী ঠাকৰেই এক ভিডিঅ’ বাৰ্তাত জনায়, মহাৰাষ্ট্ৰ চৰকাৰে স্বাস্থ্য পৰিকাঠামো উন্নতিত কাম কৰি আছে । কিন্তু কৰ’না আক্ৰান্তৰ সংখ্যা বৃদ্ধি পোৱাৰ ফলত স্বাস্থ্য পৰিসেৱাৰ ওপৰত প্ৰবল প্ৰভাৱ পৰিছে । পৰিস্থিতি নিয়ন্ত্ৰণত আনিবৰ বাবে এই সিদ্ধান্ত গ্ৰহণ কৰা হৈছে ।
ভিডিঅ’ বাৰ্তাত তেওঁ কয়, ‘এতিয়া ৰাজনীতি কৰাৰ সময় নহয় । অক্সিজেনৰ চাহিদা বৃদ্ধি পাইছে, চিকিৎসালয়ত বিছনাৰ সংখ্যা হ্ৰাস পাইছে, দৰৱৰ চাহিদাও বৃদ্ধি পাইছে । সেয়ে চৰকাৰে এই সিদ্ধান্ত গ্ৰহণ কৰিছে ।’
সমগ্ৰ মহাৰাষ্ট্ৰতে জনসমাৱেশ ৰোধ কৰিবলৈ জনতা কাৰ্ফিউ জাৰি কৰা হৈছে । বিশেষ কাৰণ নোহোৱাকৈ বাহিৰত ওলোৱাত নিষেধাজ্ঞা জাৰি কৰা হৈছে । সকলো চৰকাৰী আৰু বেচৰকাৰী পৰিসেৱা, প্ৰতিষ্ঠান বন্ধ ৰাখিব লাগিব । অৱশ্যে জৰুৰী পৰিসেৱাসমূহ অব্যাহত থাকিব । চিকিৎসালয়, স্বাস্থ্যকেন্দ্ৰ, স্বাস্থ্য বীমা কাৰ্যালয়, দৰৱৰ দোকান, দৰৱ কাৰ্যালয় খোলা থাকিব । লগতে, ছেনিটাইজাৰ, মাস্ক, প্ৰতিষেধক সৰবৰাহ আৰু প্ৰদান কাৰ্য অব্যাহত থাকিব ।
বিমান, টেক্সি, অটো, বাছ চলিব । শ্বপিং মল, চলচ্চিত্ৰ গৃহ বন্ধ থাকিব । ৰেস্তোৰাঁৰ পৰা খাদ্য ক্ৰয় কৰিব পাৰিব । কিছু সংখ্যক লোকেৰে ৰাজনৈতিক সভা, বিবাহ অনুষ্ঠান, শ্ৰাদ্ধ কৰিব পাৰিব । ইতিমধ্যে মহাৰাষ্ট্ৰত দশম আৰু দ্বাদশ শ্ৰেণীৰ পৰীক্ষা স্থগিত কৰা হৈছে ।