ক’ভিড ৰোগীসকলৰ অক্সিজেন সৰবৰাহত গাফিলতি দেখিলে কেন্দ্ৰ, ৰাজ্য বা স্থানীয় স্তৰৰ কোনো আমোলাকেই ক্ষমা কৰা নহ’ব বুলি জনায় দিল্লী উচ্চ ন্যায়ালয়ে । প্ৰয়োজন সাপেক্ষে তেওঁক ফাঁচী প্ৰদান কৰা হ’ব বুলিও সকীয়নি দিয়ে ন্যায়ালয়ে । লগতে কেন্দ্ৰক স্পষ্টভাৱে জনাবলৈ নিৰ্দেশ দিয়ে যে, চৰকাৰে দিয়া প্ৰতিশ্ৰুতি অনুসৰি দিল্লীয়ে ৪৮০ মেট্ৰিক টন অক্সিজেন কেতিয়া লাভ কৰিব ।
ভাৰতত ক’ভিড সংক্ৰমণৰ দ্বিতীয় ঢৌক ‘সুনামি’ আখ্যা দি আজি দিল্লী উচ্চ ন্যায়ালয়ে এটা গোচৰৰ পৰ্যৱেক্ষণ জনায়, চিকিৎসালয়সমূহত পৰ্যাপ্ত পৰিমাণৰ অক্সিজেন সৰবৰাহ হোৱা নাই । এই সৰবৰাহত ব্যাঘাত ঘটালে কেন্দ্ৰীয় বা ৰাজ্য চৰকাৰী কৰ্মী অথবা স্থানীয় প্ৰশাসনৰ কোনো কৰ্মকৰ্তাকে ক্ষমা কৰা নহ’ব বুলি জনায় ন্যায়ালয়ে ।
দিল্লীৰ জয়পুৰ গ’ল্ডেন হাস্পতালত অক্সিজেনৰ অভাৱত ২৫ জন ক’ভিড ৰোগীয়ে প্ৰাণ হেৰুৱাবলগীয়া হয় । আজি পুৱাই বাটৰা হাস্পতালে জনায় যে তেওঁলোকৰ তাত তিনিশজন ক’ভিড ৰোগীৰ বাবে বিছনা আছে । কিন্তু হাস্পতালত অত্যধিক ২০ মিনিট প্ৰদান কৰিব পৰাকৈহে অক্সিজেন আছে । সেয়ে ক’ভিড ৰোগীসকলৰ প্ৰাণ ৰক্ষা কৰিবৰ বাবে জৰুৰীকালীন ব্যৱস্থাত অক্সিজেন প্ৰেৰণ কৰিবৰ বাবে আহ্বান জনায় হাস্পতাল কৰ্তৃপক্ষই ।
ইয়াৰ পৰিপ্ৰেক্ষিততে আজি দিল্লী উচ্চ ন্যায়ালয়ে কেন্দ্ৰৰ পৰা জানিব বিচাৰিছে যে, কেতিয়া প্ৰতিশ্ৰুতি অনুসৰি ৪৮০ মেট্ৰিক টন ওজনৰ অক্সিজেন আহিব দিল্লী চৰকাৰৰ হাতত ।