গোৱালপাৰাৰ লক্ষীপুৰ থানাৰ অন্তৰ্গত গাৰোজান গাঁৱত সোমাবাৰে আবেলিৰ ভাগত লক্ষীপুৰ আৰক্ষীয়ে নিষিদ্ধ ড্ৰাগছ বেহাৰ বিৰুদ্ধে অভিযান চলায় ।
অভিযানত আৰক্ষীয়ে বহু পৰিমাণৰ হেৰ’ইনসহ এজন ড্ৰাগছ ব্যৱসায়ীক হাতে-লোটে ধৰিবলৈ সক্ষম হয় । ধৃত লোকজন গাৰোজান গাঁৱৰ ইক্ৰামুল হক ।
এক গোপন সূত্ৰৰ পমখেদি সোমাবাৰে অভিযানকাৰীয়ে গাৰোজানৰ ইক্ৰামুলৰ ঘৰত পোনে-পোনে অভিযান চলায় । অভিযানৰ সময়ত ইক্ৰামুলৰ ঘৰৰ পৰাই ৫০ টাকৈ হেৰ’ইন ভৰ্তি কন্টেইনাৰসমূহ উদ্ধাৰ হয় ।
অভিযানকাৰীয়ে লগে লগে উদ্ধাৰকৃত হেৰ’ইনখিনি জব্দ কৰাৰ লগতে অভিযুক্ত ইক্ৰামুলকো কৰায়ত্ত কৰে । আৰক্ষীয়ে সদৰী কৰা মতে , জব্দ কৰা হেৰ’ইনখিনি সুদূৰ মানকাছাৰৰ পৰা আনিছিল ইক্ৰামুলে ।
তদুপৰি, অভিযুক্ত ইক্ৰামুলে বহু দিনৰ পৰাই এই নিষিদ্ধ ড্ৰাগছ বেহা কাৰ্যৰ স’তে জড়িত থকাৰ কথাওঁ আৰক্ষীয়ে সাংবাদিকৰ আগত সদৰী কৰে ।