ৰাজ্যৰ প্ৰশাসনে নিতৌ উৎখাত কৰিছে ন ন ড্ৰাগছৰ ঘাটি । ড্ৰাগছমুক্ত অসম গঢ়াৰ লক্ষ্যৰে আগবাঢ়িছে মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন বিজেপি চৰকাৰ । পিছে ড্ৰাগছ আসক্তসকলে লাভ কৰা নাই প্ৰয়োজনীয় চিকিৎসা । এতিয়াও ৰাজ্যত পৰ্যাপ্ত পৰিমাণে মজুত নাই ড্ৰাগছ আসক্তৰ ঔষধ ।
ড্ৰাগছ আসক্তসকলক এই আসক্তিৰ পৰা মুক্ত হোৱাৰ দিশত আশাৰ ৰেঙণী কঢ়িয়াই আনিছে পাঠশালাৰ নিচা দূৰীকৰণ আৰু পুনৰ সংস্থাপন কেন্দ্ৰ মংগলমে । ২০০৭তে পাঠশালাত স্থাপন হোৱা অনুষ্ঠানতটোৰ জৰিয়তে বহু নিচাসক্তই লাভ কৰিছে আৰোগ্য । অনুষ্ঠানটোক জন্ম দিয়া বিজয় শৰ্মা আৰু ভূপেশ কাকতি একালত দুয়ো আছিলে ড্ৰাগছ আৰু সুৰা আসক্ত যুৱক ।
হিৰ’ইন, কফচিৰাপ, সুৰা আদিৰ বিভিন্ন নিচাত নিচাসক্ত হৈ পৰিছিল দুয়ো । ২০০৪ত গুৱাহাটীৰ এখন নিচা মুক্তি কেন্দ্ৰত লাভ কৰা চিকিৎসাৰ জৰিয়তে বিজয় শৰ্মাই নিচাগ্ৰস্ততাৰ পৰা মুক্তি লাভ কৰিছিল । ২০০৫ত পুনৰ সেই নিচা মুক্তি কেন্দ্ৰত সুৰাসক্ত ভূপেশ কাকতিক লগ পাই দুয়ো পৰিকল্পনা কৰিছিল পাঠশালাত এখন নিচা দূৰীকৰণ আৰু পুনৰ সংস্থাপন কেন্দ্ৰ খোলাৰ ।
সেই অনুযায়ী দুয়ো পাঠশালাত ২০০৭ত আৰম্ভ কৰিছিল নিচা দূৰীকৰণ আৰু পুনৰ সংস্থাপন কেন্দ্ৰ মংগলম নামে এটি অনুষ্ঠান । উত্তৰ পূৰ্বাঞ্চলৰ বিভিন্ন ঠাইৰ পৰা অহা নিচাসক্তসকলৰ প্ৰায় ৮৫ শতাংশ ৰোগীয়ে নিচাসক্তৰ পৰা সম্পূৰ্ণৰূপে নিৰ্মূল হৈছে । বৰ্তমানো প্ৰায় ৯০ গৰাকী ৰোগী চিকিৎসাধীন হৈ আছে এই নিচা দূৰীকৰণ কেন্দ্ৰ মংগলমত ।
নিচাসক্ত ৰোগীক কেন্দ্ৰটোত ভৰ্তি হোৱাৰ পাছতেই প্ৰথমে স্বাস্থ্য পৰীক্ষাৰ কৰি আৰম্ভ কৰা হয় বাকী চিকিৎসাসমূহ । মানসিক চিকিৎসা, যোগাসন, আধ্যাত্মিক আদি বিভিন্ন ধৰণে চিকিৎসা প্ৰদান কৰা হয় ৰোগীসকলক । ৰাতিপুৱাৰ পৰাই ৰোগীসকলে এক দীঘলীয়া কঠোৰ নীতি-নিয়মৰ মাজেৰেই পালন কৰিব লগা হয় প্ৰতিটো দিন ।
প্ৰায় দুমাহ এই কেন্দ্ৰত চিকিৎসা লাভ কৰাৰ পাছতহে নিচাগ্ৰস্ত ব্যক্তিয়ে সম্পূৰ্ণৰূপে পৰিহাৰ কৰিব নিজৰ বদ অভ্যাসসমূহ বা নিচা গ্ৰহণৰ প্ৰৱনতা । দুমাহ চিকিৎসাৰ অন্তত সম্পূৰ্ণৰূপে সুস্থ হোৱাৰ পাছতেই পৰিয়ালৰ ব্যক্তিসকলক ৰোগীয়ে মানিবলগীয়া সকলো নীতি নিয়মৰ সম্পৰ্কে ব্যাখ্যা কৰে কেন্দ্ৰটোৰ পৰিচালকে । ৰোগীসকলে নিজৰ গৃহতো সকলো নীতি নিয়ম পালনেৰে এক নতুন জীৱন যাপন কৰিবলৈ সক্ষম হয় ।
সম্প্ৰতি ৰাজ্য চৰকাৰে ৰাজ্যৰ বিভিন্ন স্থানৰ ড্ৰাগছৰ ঘাটিসমূহ উৎখাত কৰি এক নতুন দিগন্তৰ সুচনা কৰিছে যদিও ড্ৰাগছ আসক্তসকলৰ বাবে প্ৰয়োজনীয় ঔষধ বিচাৰি লাভ নকৰি চিন্তিত হৈ পৰিছে অভিভাৱকসকল । ড্ৰাগছ তথা সুৰা আসক্তসকলৰ বাবে এতিয়া এই কেন্দ্ৰটোৱেই আশাৰ ৰেঙণী কঢ়িয়াই আনিছে ।