উপ-নিৰ্বাচনত আটাইবোৰ আসন যাব বিজেপিৰ দখললৈ, ভৱানীপুৰতো এইবাৰ পদুম ফুলিব : ভবেশ কলিতা
ভৱানীপুৰ বিধানসভা সমষ্টিৰ এআইইউএফৰ বিধায়ক ফনীধৰ তালুকদাৰে বিজেপিত যোগদান সন্দৰ্ভত সৰব চৰ্চা চলি থকা সময়ছোৱাতেই আজি বিজেপিৰ অসম ৰাজ্যিক সমিতিৰ সভাপতি ভবেশ কলিতাই ভৱানীপুৰত স্পষ্টভাৱে ঘোষণা কৰিলে বিধায়ক ফনীধৰ তালুকদাৰৰ বিজেপিৰ যোগদান নিশ্চিত বুলি । উল্লেখ্য যে বিজেপিৰ ভৱানীপুৰস্থিত কাৰ্যালয়ত আজি বিয়লি অনুষ্ঠিত এখন সংবাদ মেলত বিজেপিৰ অসম ৰাজ্যিক সমিতিৰ সভাপতি ভবেশ কলিতাই কয় যে, অহা এক ছেপ্টেম্বৰত ভৱানীপুৰ বিধানসভা সমষ্টিৰ এআইইউএফৰ বিধায়ক ফনীধৰ তালুকদাৰে বিজেপিৰ গুৱাহাটীস্থিত কাৰ্যালয়ত বিজেপি দলত আনুষ্ঠানিকভাৱে যোগদান কৰিব।
বিধায়ক ফনীধৰ তালুকদাৰে এআইইউএফ দল ত্যাগ কৰিব। বিধায়ক পদো ত্যাগ কৰিব। ভৱানীপুৰ বিধানসভা সমষ্টি উপ নিৰ্বাচনৰ পিনে গতি কৰিব । তেওঁ কয়, ‘আজিয়েই কওঁ যে উপ-নিৰ্বাচনত ভৱানীপুৰ বিধানসভা সমষ্টি বিজেপিয়ে দখল কৰাটো এশ শতাংশই নিশ্চিত । ভৱানীপুৰত এইবাৰ পদুম ফুলিব। তেনেদৰে অসমত হ’বলগীয়া উপ-নিৰ্বাচনত আটাইবোৰ আসন মিত্ৰজোঁটে দখল কৰিব ।’
ৰাজ্যিক বিজেপিৰ সভাপতি কলিতাই সাংবাদিকৰ এক প্ৰশ্নোত্তৰত কয় যে, যোৱা নিৰ্বাচনত ভৱানীপুৰ বিধানসভা সমষ্টিত অগপ দলে প্ৰতিদ্বন্দিতা আগবঢ়াইছিল। কিন্তু বিধায়ক ফনীধৰ তালুকদাৰে যিহেতু বিজেপি দলত যোগদান কৰিব, গতিকে তেওঁ বিজেপি দলৰ হৈ উপ-নিৰ্বাচনত প্ৰতিদ্বন্দিতা কৰিব। বিধায়ক ফনীধৰ তালুকদাৰে যদি অগপ দলত যোগদান কৰিলে হয়, অগপ দলৰ প্ৰাৰ্থীৰূপে প্ৰতিদ্বন্দিতা কৰিলেহেঁতেন ।
প্ৰসংগক্ৰমে বিজেপিৰ ৰাজ্যিক সভাপতি কলিতাই কয়, ‘যিসকল বিৰোধী বিধায়কে দেখিছে যে তেওঁলোকে নিজৰ দলত থাকি উন্নয়নৰ কাম কৰাৰ বাবে সক্ষম নহ’ব, তেওঁলোকেই বিজেপিলৈ ঢাপলি মেলিছে । কাৰণ মুখ্যমন্ত্ৰী হিমন্ত বিশ্ব শৰ্মাৰ নেতৃত্বত অসম চৰকাৰে এইবাৰৰ বাজেটত গুৰুত্বপূৰ্ণ জনকল্যাণমূলক আঁচনি গ্ৰহণ কৰিছে । যি আঁচনিয়ে অসমৰ জনসাধাৰণক চুই যাবলৈ সক্ষম হৈছে । বাজেটৰ প্ৰতিটো শাৰী, প্ৰতিটো শব্দই কেৱল উন্নয়ন, শান্তি আৰু প্ৰগতিৰ বাবে এই চৰকাৰখনৰ প্ৰতিশ্ৰুতি আছে । সেয়া দৃঢ়ভাৱে প্ৰকাশ পাইছে ।’
আজিৰ সংবাদমেলত ভৱানীপুৰ বিধানসভা সমষ্টিৰ বিজেপি নেতা-নেত্ৰী ক্ৰমে ভূপেন মেধি, মামনী পাটগিৰি, পুলক বৈশ্য, প্ৰফুল্ল বৈশ্য, চপেন্দ্ৰ কলিতা, উমেশ তালুকদাৰ, মণ্টু তালুকদাৰ, ৰঘূ তালুকদাৰ, ধ্ৰুৱজ্যোতি মেধি, অজয় দাস আদিয়ে উপস্থিত থাকে ।
আনহাতে বিজেপিৰ অসম ৰাজ্যিক সমিতিৰ সভাপতি ভবেশ কলিতাই পৃথকে ভৱানীপুৰ বিধানসভা সমষ্টিৰ বিজেপি দলৰ নেতা-কৰ্মীৰ স’তে এক গুৰুত্বপূৰ্ণ বৈঠকত মিলিত হৈ ভৱানীপুৰ বিধানসভা সমষ্টিত হ’বলগীয়া উপ-নিৰ্বাচন সন্দৰ্ভত বিভিন্ন নীতি নিৰ্দেশনা দিয়ে ।