কে’বাটাও গুৰুত্বপূৰ্ণ কাৰ্যসূচী লৈ বাগসা জিলাত উপস্থিত হয় বিটিআৰৰ মুৰব্বী প্ৰমোদ বড়ো । ‘পৰিৱৰ্তন অভিযান’ৰ কাৰ্যসূচীৰে জিলাখনৰ কে’বাটাও দৰিদ্ৰ পৰিয়ালৰ ঘৰত উপস্থিত হৈ দুখ দুৰ্গতিৰ বুজ লোৱাৰ লগতে কে’বাগৰাকী ৰোগীক সাক্ষাৎ কৰে প্ৰমোদ বড়োৱে । ইয়াৰ পাছতেই শালবাৰীৰ শিমলাত অনুষ্ঠিত এক কাৰ্যসূচীত ভাগ লয় বিটিআৰৰ মুখ্য কাৰ্যবাহী বিষয়াগৰাকীয়ে ৷
উক্ত কাৰ্যসূচীত যুদ্ধ বিৰতিত থকা এনডিএফবি সদস্যসকলক সংস্থাপিত কৰাৰ উদ্দেশ্যে আৰক্ষী বিভাগ আৰু সেনা বাহিনীত নিযুক্তিৰ বাবে প্রি-ট্ৰেইনিঙৰ ব্যৱস্থা কৰে ৷ আনহাতে, ডিমা হাছাও জিলাত উগ্ৰপন্থীৰ হিংসাত্মক কাৰ্যত দুখিত বিটিআৰৰ মুৰব্বী বড়ো । তেওঁ মন্তব্য কৰে যে, এয়া হ’ব নালাগিছিল, ডিমা হাছাওত সংঘটিত কুটাঘাতে চৰকাৰৰ কৰণীয় বাকী থকাটোকেই সূচাইছে । হিংসাত্মক কাৰ্যই এটা জনগোষ্ঠীক বহুবছৰ পিছুৱাই লৈ যায়।
ইয়াৰ পাছতেই বড়োৱে জালাহত অনুষ্ঠিত এক অনুষ্ঠানত ৬৩ নং চাপাগুৰি সমষ্টিৰ গাওঁবুঢ়াসকলৰ লগত মত বিনিময় কৰে ৷ উক্ত অনুষ্ঠানত মন্ত্ৰী ইউ জি ব্ৰহ্ম, দিহিৰা পৰিষদীয় সমষ্টিৰ পাৰিষদ ঘনশ্যাম দাসো উপস্থিত থাকে । যোগাযোগ ব্যৱস্থা উন্নত কৰাৰ স্বাৰ্থত চৰকাৰী গাওঁবুঢ়াসকলৰ মাজত ম’বাইল ফোন বিতৰণ কৰে প্ৰমোদ বড়োৱে ।