অসম আন্দোলনৰ সক্ৰিয় কৰ্মী, হাউলীৰ হালাপাকুৰী গাঁৱৰ নিৱাসী তথা চকু চিকিৎসা বিষয়ৰ সহায়ক ধনেশ্বৰ দাসৰ আজি পুৱা প্ৰায় ৫:৩০ বজাত গুৱাহাটীৰ এখন ব্যক্তিগত চিকিৎসালয়ত পৰলোকপ্ৰাপ্তি ঘটে ।
মৃত্যুৰ সময়ত তেখেতৰ বয়স আছিল ৫৯ বছৰ । বৃক্ক বিকল হৈ বৰ্তমানে চিকিৎসাধীন অৱস্থাত আছিল যদিও আজি শেষ নিশ্বাস ত্যাগ কৰে । প্ৰয়াত দাসে ঐতিহাসিক অসম আন্দোলনৰ সময়ত সক্ৰীয় ভূমিকা পালন কৰিছিল।
আন্দোলনৰ সময়ত ঐতিহ্যমণ্ডিত হাউলীৰ হালাপাকুৰী গাঁৱত দুৰ্বৃত্তই অগ্নি সংযোগ কৰাৰ সময়ত গাঁওবাসীক ৰক্ষা কৰাত সক্ৰীয় ভূমিকা পালন কৰিছিল প্ৰয়াত দাসে ।
উল্লেখ্য যে, হালাপাকুৰী গাঁৱতে প্ৰাথমিক শিক্ষা সমাপ্ত হোৱাৰ পাছত বৰবাৰীঝাৰ হাইস্কুলৰ পৰা হাইস্কুল শিক্ষান্ত পৰীক্ষাত উত্তীৰ্ণ হয় । ইয়াৰ পাছত বৰপেটাৰ মাধৱ চৌধুৰী মহাবিদ্যালয় স্নাতক বিজ্ঞানত উত্তীৰ্ণ হৈ বি এচ ছিত নাম ভৰ্তি কৰিছিল যদিও ঘৰৰ অৱস্থা বেয়া হোৱাৰ বাবে ডিগ্ৰী সম্পূৰ্ণ নৌহওঁতেই গুৱাহাটীলৈ গুছি যায় ।
ইয়াৰ পাছত গুৱাহাটীত থাকি গুৱাহাটী চিকিৎসা মহাবিদ্যালয় হস্পিতালত চকু চিকিৎসা বিষয়ৰ সহায়ক নাম ভৰ্তি কৰে । ১৯৮৬ চনত চকু চিকিৎসাৰ বিষয় সমাপ্ত কৰি ঘৰলৈ আহে আৰু ১৯৮৭ চনত চকু চিকিৎসা বিষয়ৰ সহায়ক হিচাপে চৰকাৰী নিযুক্তি লাভ কৰ্ম জীৱনৰ পাতনি মেলে ।
মৃত্যুৰ সময়ত প্ৰয়াত দাসে পত্নীসহ এজন পুত্ৰ, এজন কন্যাৰ লগতে বহু আত্মীয় স্বজনক এই ইহ সংসাৰত এৰি থৈ যায় । প্ৰয়াত দাসে মৃত্যুৰ আগমুহূৰ্তলৈ সদৌ হাউলী ৰঙালী বিহু উদযাপন সমিতি, শ্ৰীমন্ত শঙ্কৰদেৱৰ সমাজকে ধৰি কেইবাটাও সামাজিক, সাংস্কৃতিক সংগঠনৰ লগত ঘনিষ্ঠ হৈ আছিল ।
প্ৰয়াত দাসৰ মৃত্যুত হাউলী আঞ্চলিক ছাত্ৰ সন্থাৰ প্ৰাক্তন সভাপতি যুগান্ত বায়ন, অৱসৰপ্ৰাপ্ত শিক্ষক হেমচন্দ্ৰ দাস, হালাপাকুৰী শ্ৰীমন্ত শঙ্কৰদেৱ সমাজৰ সভাপতি প্ৰদীপ দাস, সম্পাদক কৌশিক কমল দাস, বৃহত্তৰ হাউলী উন্নয়ন পৰিষদৰ সম্পাদক ধৰণীধৰ দাসকে ধৰি হাউলী আঞ্চলিক ছাত্ৰ সন্থা, হাউলী ক্ৰীড়া সন্থা, হাউলী নগৰ উন্নয়ন পৰিষদ, বৃহত্তৰ হাউলী উন্নয়ন পৰিষদ, হাউলী ৰাস মহােৎসৱ উদযাপন সমিতি, সদৌ হাউলী ৰঙালী বিহু উদযাপন সমিতি, হাউলী কাৰবাৰী সন্থা, হাউলী সাহিত্য সভা, হাউলী কবি সন্মিলন,হাউলীৰ সাংবাদিক দিদাৰ হুছেইন,নয়নমণি ওজাই গভীৰ শোক প্ৰকাশ কৰি শোকসন্তপ্ত পৰিয়াল বৰ্গক সমবেদনা জ্ঞাপন কৰিছে ।
প্ৰয়াত দাসৰ নশ্বৰ দেহ ক’ভিড প্ৰ’টকল মানি হালাপাকুৰী – মৌটুপুৰী ৰাজহুৱা শ্মশানত অন্ত্যেষ্টিক্ৰিয়া সম্পন্ন কৰা হয় । উল্লেখ্য যে, প্ৰয়াত দাসৰ পত্নী ৰীণা দাস হাউলীৰ বৰবাৰীঝাৰ হাইস্কুলৰ শিক্ষয়ত্ৰী ।