পাঁচ ৰাজ্যত বিধানসভা নিৰ্বাচনৰ প্রস্তুতি আৰু সেই সূত্রে কৃষক প্ৰতিবাদ সমাধানৰ সম্ভাব্য পথক লৈ বিস্তাৰ আলোচনা হয় ৰাষ্ট্ৰীয় স্বয়ংসেৱক সংঘৰ দুদিনৰ বৈঠকত । নাগপুৰৰ সংঘ আৰু তেওঁলোকৰ শাখা সংগঠনবোৰৰ এই আলোচনাত আফগানিস্তান পৰিস্থিতিও উত্থাপন কৰা হয় ।
সংঘ সূত্রৰ খবৰ, কালি আৰু আজি এই সমন্বয় বৈঠকত পাঁচখন ৰাজ্যৰ আসন্ন নিৰ্বাচনক লৈ মূলত আলোচনা হয় । এই পাঁচ ৰাজ্যৰ ভিতৰত গোৱা, মণিপুৰ, উত্তৰপ্রদেশ আৰু উত্তৰাখণ্ডত ক্ষমতাত আছে বিজেপি । এই ৰাজ্যকেইখনত ক্ষমতা বাহাল ৰখাৰ কৌশলক লৈ বৈঠকত আলোচনা হোৱাৰ লগতে, পঞ্জাৱত কেনেদৰে ক্ষমতা দখল কৰিব পাৰি, তাক লৈও চর্চা হয় ।
কৃষকসকলৰ আন্দোলনৰ বিষয়টোও উত্থাপন হয় । যোৱা নৱেম্বৰৰ পৰা কৃষি আইন প্রত্যাহাৰৰ দাবীত দিল্লীৰ সীমান্তত আছে কৃষকসকল । কোন পথেৰে আগবাঢ়িলে শান্তিপূর্ণভাৱে এই বিক্ষোভৰ নিষ্পত্তি সম্ভৱ, তাক লৈও বিতং আলোচনা হয় বৈঠকত । সূত্র অনুসৰি, অধিকাংশ সংঘ নেতাৰ মতে, কৃষকসকলৰ আন্দোলন দ্রুত প্রত্যাহাৰ নহ’লে পঞ্জাৱত ভাল ফলৰ আশা নাই আৰু কৃষিবহুল পশ্চিম উত্তৰপ্রদেশতো ভাল ফলাফল নকৰিব বিজেপিয়ে । সেয়ে কৃষকসকলৰ স’তে চৰকাৰেও অধিক
আলোচনাত মিলিত হোৱা উচিত বুলি মত অধিকাংশ সংঘ নেতাৰ । ইয়াকে লৈ বিজেপিৰ ওপৰত চাপ বঢ়োৱাৰ কথা ভবা হৈছে । বৈঠকত বিশ্ব হিন্দু পৰিষদৰ নেতাসকলো উপস্থিত আছিল ন।
তালিবানে আফগানিস্তান দখল কৰাৰ ফলত কাশ্মীৰৰ বৰ্তমানৰ শান্ত পৰিস্থিতি নষ্ট হ’ব পাৰে বুলিও আশংকা প্রকাশ কৰা হৈছে বৈঠকত । সংঘ নেতাসকল একমত যে, কাশ্মীৰৰ স্বার্থত বিষয়টোক লৈ কেন্দ্রই অধিক তৎপৰ হোৱা প্ৰয়োজন । দেশৰ মুছলমান সমাজে যাতে তালিবানৰ বিৰুদ্ধে মাত মাতে, তাৰ বাবেও উদ্যোগী হৈছে সংঘ । সূত্রৰ মতে, তালিবানৰ উত্থানত ভাৰতৰ বিপদৰ সম্ভাৱনাৰ বিষয়টোক লৈ অহা সোমবাৰে দেশৰ মুছলিম সমাজৰ কিছু বিশিষ্টজনৰ স’তে মুম্বইত বৈঠকত মিলিত হ’ব সংঘ প্রধান মোহন ভাগৱত ।