ৰাজ্যৰ উন্নয়ন পৰিষদবোৰে এতিয়াৰে পৰা একক সিদ্ধান্তৰে পুঁজি ব্যয় কৰিব নোৱাৰিব । পৰিষদখনে পুঁজি ব্যয়ৰ ক্ষেত্ৰত সংশ্লিষ্ট জনগোষ্ঠীৰ সংগঠনসমূহৰ লগত আলোচনা কৰিহে পুঁজি ব্যয়ৰ সিদ্ধান্ত ল’ব পাৰিব । অতিশীঘ্ৰে চৰকাৰৰ এই সিদ্ধান্তই আনুষ্ঠানিক ৰূপ পাব । তাৰ পূৰ্বে মুখ্যমন্ত্ৰী হিমন্ত বিশ্ব শৰ্মাই কে’বাটাও জনগোষ্ঠীৰ লগত অব্যাহত ৰখা আলোচনাৰ প্ৰক্ৰিয়াত চৰকাৰৰ এই সিদ্ধান্তৰ বিষয়ে অৱগত কৰে ।
ইয়াৰ লগতে একাংশ জনগোষ্ঠীক উন্নয়নমূলক কাম-কাজৰ বাবে পুঁজি আৱণ্টনৰ যি প্ৰতিশ্ৰুতি নিৰ্বাচনৰ পূৰ্বে দিয়া হৈছিল সেয়াও কাৰ্যকৰী কৰিবলৈ চৰকাৰ আগবাঢ়িছে বুলি মুখ্যমন্ত্ৰীয়ে সদৰী কৰে । অৱশ্যে কিস্তি হিচাপতহে সেই ধন আদায় দিয়া হ’ব । ধন আদায়ৰ প্ৰসংগত উন্নয়ন পৰিষদবোৰৰ একক ক্ষমতা কৰ্তন কৰি পুঁজি ব্যয়ৰ ক্ষেত্ৰত সংশ্লিষ্ট জনগোষ্ঠীয় সংগঠনবোৰকো সাঙুৰি লোৱা হয় । এনে সিদ্ধান্তৰ দ্বাৰা চৰকাৰে সংশ্লিষ্ট জনগোষ্ঠীবোৰৰ সংগঠনসমূহক ‘হাতত ৰখা’ৰ কৌশল অৱলম্বন কৰা বুলিও চৰ্চা আৰম্ভ হৈছে ।
উন্নয়ন পৰিষদবোৰে হিতাধিকাৰী বাছনিৰে বিভিন্ন আঁচনি ৰূপায়ণ কৰি আহিছে । ইমানদিনে পৰিষদে নিজে হিতাধিকাৰী বাছনি কৰি আহিছিল । নতুন সিদ্ধান্ত অনুসৰি হিতাধিকাৰী বাছনি প্ৰক্ৰিয়াত এতিয়াৰে পৰা পৰিষদে নিজৰ নিজৰ জনগোষ্ঠীৰ ছাত্ৰ সংগঠন, মহিলা সংগঠন আদিকো অন্তৰ্ভুক্ত কৰিব লাগিব ।
তদুপৰি, সংগঠনবোৰে নিজেও আঁচনিৰ প্ৰস্তাৱ পৰিষদৰ ওচৰত দাখিল কৰিব পাৰিব । উল্লেখ্য যে অসমত ৩১খন উন্নয়ন পৰিষদ আছে । পৰিষদবোৰে নিয়মীয়াকৈ পুঁজিলাভ প্ৰক্ৰিয়া আজিলৈকে স্বাভাৱিক হৈ উঠা নাই । এই প্ৰক্ৰিয়াটো স্বাভাৱিক কৰা হ’ব বুলি আশ্বাস মুখ্যমন্ত্ৰীয়ে দিয়ে বুলি আলোচনাত অংশ লোৱা সংগঠনৰ নেতাৰ সূত্ৰই সদৰী কৰে ।