দক্ষিণ ছুদানত ৰাষ্ট্ৰসংঘৰ শান্তিৰক্ষী বাহিনীৰ সদস্য হিচাপে কৃতিত্বৰ নজিৰ ৰক্ষাৰ বাবে পুৰস্কৃত কৰা হ’ল ৮৩৬ জন ভাৰতীয় সেনাক । ৰাষ্ট্ৰসংঘৰ তৰফৰ পৰা মঙলবাৰে এই কথা জনোৱা হয় । দক্ষিণ ছুদানৰ আপাৰ নাইল প্রদেশৰ মলাক্কাল অঞ্চলৰ পৰা সম্প্রতি উভতি আহিছে এই ভাৰতীয় সেনাসকল ।
ছুদানৰ পৰা বিচ্ছিন্ন হৈ ২০১১ৰ ন জুলাইত স্বাধীন হৈছিল দক্ষিণ ছুদান । কিন্তু এতিয়াও সেই দেশৰ ১০খন প্রদেশৰ অধিকাংশতেই ছুদানৰ সহায়ত পুষ্ট সন্ত্ৰাসবাদীসকলৰ স’তে সংঘর্ষ চলি আছে দক্ষিণ ছুদান সেনাবাহিনীৰ । সেয়ে পৰিস্থিতি নিয়ন্ত্রণৰ বাবে বিগত এক দশক ধৰি ৰাষ্ট্ৰসংঘৰ শান্তিৰক্ষীসকলক মোতায়েন কৰি ৰখা হৈছে ।
বিগত এক দশকত একাধিকবাৰ দক্ষিণ ছুদানৰ বিদ্রোহীসকলৰ লক্ষ্য হৈছে ৰাষ্ট্ৰসংঘৰ ভাৰতীয় শান্তিৰক্ষীসকল । বহু কেইজন বিষয়া আৰু জোৱানৰ মৃত্যুও হৈছে । কিন্তু প্রতিকূল পৰিস্থিতিতো মলাক্কাল অঞ্চলত শান্তি ঘূৰাই আনিবলৈ সক্ষম হৈছে ভাৰতীয় বাহিনী । দক্ষিণ ছুদানৰ ভাৰতীয় ৰাষ্ট্রদূত বিষ্ণু শর্মাই মঙলবাৰে কয়, ‘‘ভাৰতীয় সেনাৰ এই কৃতিত্বই আমাক গর্বিত কৰিছে ।’’
দক্ষিণ ছুদানত ৰাষ্ট্ৰসংঘৰ ১৮,৩০০ শান্তিৰক্ষী মোতায়েন কৰা হৈছে । ইয়াৰ ভিতৰত ভাৰতীয় সেনাৰ সংখ্যা প্রায় ২,৪০০জন । দক্ষিণ ছুদানত মোতায়েন ভাৰতীয় বাহিনীৰ প্রধান লেফটেনেন্ট জেনেৰেল শৈলেশ তিনাইকৰে জনাইছে, তাত ৰাষ্ট্ৰসংঘ বাহিনীৰ ৭৩খন দেশৰ সেনা আৰু আৰক্ষী মোতায়েন আছে । ইয়াৰে সংখ্যাৰ হিচাপত ভাৰতীয় সেনাৰ অৱস্থান দ্বিতীয় ।