অনিয়ম, বিশৃংখলা, খাম-খেয়ালি আৰু বিসংগতিপূৰ্ণ আচৰণৰ মাজতো নিয়মৰ সন্ধান আৰু তাৰ নিখুঁত পূৰ্বাভাসৰ পথ দেখুওৱা বাবে এইবাৰ পদাৰ্থ বিজ্ঞানৰ ন’বেল বঁটা যুটীয়াভাৱে প্ৰদান কৰা হয় তিনিজন বিজ্ঞানীক ।
আমেৰিকাৰ প্ৰিন্সটন বিশ্ববিদ্যালয়ৰ অধ্যাপক ছুকোৰো মানাবে, জাৰ্মানীৰ মেক্স প্লাংক ইনষ্টিটিউট ফৰ মেটিউৰিল’জিৰ অধ্যাপক ক্লজ হেছেলমান আৰু ইটালীৰ ৰোমৰ ছাপিয়েঞ্জা বিশ্ববিদ্যালয়ৰ অধ্যাপক জিঅ’ৰ্জিঅ’ পাৰিছিয়ে যুটীয়াভাৱে পদাৰ্থ বিজ্ঞানৰ ন’বেল পুৰস্কাৰ জয়ী বুলি আজি ঘোষণা কৰে ছুইডেনৰ ন’বেল কমিটিয়ে ।
এই তিনিও বিজ্ঞানীয়ে দাঙি ধৰিছে কিদৰে মানুহে প্ৰকৃতি, পৰিৱেশৰ খাম-খেয়ালিপূৰ্ণ আৰু অস্বাভাৱিক আচৰণ । যাৰ বাবে সম্প্ৰতি মানুহে শীতৰ দিনতো গ্ৰীষ্মকালৰ দৰে ঘামিব লগা হৈছে । নিম্নচাপৰ দৌৰাত্ম্য, ঘূৰ্ণী ধুমুহা আদিৰ তাণ্ডৱ বৃদ্ধি পাইছে সমুদ্ৰৰ উপকূলৱৰ্তী অঞ্চলসমূহত ।
চলিত নৱেম্বৰত গ্লাছগ’ত অনুষ্ঠিত হ’বলগীয়া ৰাষ্ট্ৰসংঘৰ জলবায়ু সন্মিলনৰ দৰে অতি গুৰুত্বপূৰ্ণ বৈঠকৰ পূৰ্বে এই বঁটা প্ৰদান অত্যন্ত প্ৰাসংগিক হিচাপে বিবেচিত হৈছে । বঁটাপ্ৰাপক অধ্যাপক পাৰিছিয়ে কয়, ‘আমি এতিয়া দ্ৰুতগতিৰে কাম কৰিব লাগিব ।’ পলম কৰাৰ সময় নাই বুলি তেওঁ কয় । নিউজাৰ্ছিৰ প্ৰিন্সটন বিশ্ববিদ্যালয়ৰ জ্যেষ্ঠ বতৰ বিজ্ঞানী ৯০ বছৰীয়া মানাবেই তেওঁৰ আৱিস্কাৰত দেখুৱাইছে যে কিদৰে বাতাবৰণত কাৰ্বন-ডাই-অক্সাইডৰ বৃদ্ধিয়ে পৃথিৱীৰ তাপমাত্ৰা বৃদ্ধি কৰিব পাৰে । ৮৯ বছৰীয়া হেলছমান বতৰ আৰু জলবায়ু সংযোগ কৰিব পৰা এটা কম্পিউটাৰ মডেল সৃষ্টি কৰিছে । আপতদৃষ্টিত চাবলৈ গ’লে ৭৩ বছৰীয়া পাৰিছিয়ে প্ৰকৃতাৰ্থত এই সম্পৰ্কে কাম আৰম্ভ কৰিছিল । বিশ্বজুৰি গোলকীয় উষ্ণতাই হাহাকাৰ পৰিস্থিতিৰ সৃষ্টি কৰাৰ সময়তে তিনি বিজ্ঞানীৰ গৱেষণাই ইতিহাস সৃষ্টি কৰিলে । ন’বেল কমিটীয়ে কয়, ‘তিনিজনৰ গৱেষণাই বিজ্ঞানৰ ইতিহাসৰ যুগান্তকাৰী ঘটনা ।’
বিগত শতাব্দীৰ ৬০ৰ দশকত মানাবেই গৱেষণা কৰিছিল, ৭০ৰ দশকত হেছেলমানে তেওঁৰ গৱেষণা কৰিছিল আৰু পেৰিছিৰ গৱেষণা আছিল ৮০ৰ দশকত । প্ৰকৃত অথবা পৰিৱেশৰ খাম-খেয়ালি আচৰণৰ বাবে কেতিয়া কিমান পৰিমাণৰ বৰষুণ হ’ব অথবা কিমান কঠিন ৰ’দে তাপমাত্ৰা অসহনীয় কৰি তুলিব এইবোৰ বিষয়ে সঠিক পূৰ্বানুমান কৰাটো প্ৰত্যাহ্বান হৈ পৰে । কেতিয়াবা দেখা যায় বৰষুণৰ পূৰ্বানুমানৰ পৰিৱৰ্তে ৰ’দে উগ্ৰমূৰ্তী ধাৰণ কৰে অথবা ৰৌদ্ৰজ্জ্বল দিনৰ পূৰ্বাভাস সলনি হয় নেৰানেপেৰা বৰষুণলৈ ।
৬০ৰ দশকত মানাবেৰ গাণিতিক মডেলে দেখুৱাইছিল কিদৰে বায়ুমণ্ডলত কাৰ্বন-ডাই-অক্সাইডৰ পৰিমাণ বৃদ্ধি হোৱাৰ লগে লগে ভূপৃষ্ঠৰ তাপমাত্ৰা বৃদ্ধি পায় । কিদৰে বায়ুমণ্ডলৰ ওপৰৰ স্তৰসমূহ ভূপৃষ্ঠৰ দৰে গৰম হৈ নুঠে । তেওঁৰ এই মডেল এতিয়া জলবায়ুৰ পূৰ্বাভাসৰ মডেলসমূহৰ প্ৰধান হাথিয়াৰ হৈছে । ইয়াৰ ১০ বছৰ পাছৰ গৱেষণাত বাতাবৰণ আৰু জলবায়ুৰ মাজত সংযোগ সাধন কৰিলে হেলছমানে ।
আনহাতে, পেৰিছিয়ে যিকোনো জটিল বযৱস্থাৰ মাজতে থকা এই সকলোবোৰ অনিয়ম, বিশৃংখলতা আৰু খাম-খেয়ালিৰ মাজত শৃংখলা বিচাৰি এইসমূহৰ মতি-গতি আগতীয়াকৈ বুজি উঠাৰ পথ দেখুৱাইছিল তেওঁৰ গাণিতিক মডেলত ।
উল্লেখ্য যে ন’বেল বঁটাৰ ধন এক কোটি ক্ৰোনাৰ অৰ্থাৎ ছুইডিছ মুদ্ৰাৰ আধা অংশ মানাবে আৰু হাছেলমানে লাভ কৰিছে তথা বাকী আধা লাভ কৰিছে পাৰিছিয়ে । উল্লেখ্য যে ১৯০১ত ন’বেল বঁটা প্ৰদানৰ আৰম্ভণিৰে পৰা এই পৰ্যন্ত ২১৮জনে পদাৰ্থ বিজ্ঞানত ন’বেল বঁটা লাভ কৰিছে । ইয়াৰ ভিতৰত মাত্ৰ চাৰিগৰাকী মহিলা ।