বাগসাৰ শালবাৰীৰ খাগ্ৰাবাৰীত বেঁকী নৈত যোৱা ১৬ অক্টোবৰত সংঘটিত হোৱা নাও দুৰ্ঘটনাত নিৰুদিষ্ট এগৰাকী মহিলাৰ মৃতদেহ আজি খাগ্ৰাবাৰীৰ নৈৰ ঘাটত উদ্ধাৰ হয়৷
উদ্ধাৰ হোৱা মৃতদেহটো খাগ্ৰাবাৰীৰ জগদেও ৰাম ৰবিদাসৰ পত্নী তথা তিনি সন্তানৰ মাতৃ লক্ষ্মীনী ৰবিদাস(৪৩)ৰ বুলি আৰক্ষী,পৰিয়াল তথা স্থানীয় ৰাইজে চিনাক্ত কৰিছে৷
আজি ৰাতিপুৱাৰ ভাগত নৈপৰীয়া লোকে খাগ্ৰাবাৰী শিৱ মন্দিৰৰ দক্ষিণ দিশত বেঁকী নৈৰ পানীত ওপঙি থকা অৱস্থাত প্ৰত্যক্ষ কৰে মৃতদেহটো৷তাৰ পাছতে গোৱৰ্ধনা আৰক্ষী খবৰ পাই ঘটনাস্থলীত উপস্থিত হৈ মৃতদেহটো উদ্ধাৰ কৰি গোৱৰ্ধনা থানালৈ লৈ যায়৷
ইফালে ৰাজ্যত কে’বাটাও নাও দুৰ্ঘটনা সংঘটিত হোৱাৰ পাছতো প্ৰশাসনে শিক্ষা নোলোৱাত আজি ক্ষোভিত হৈ পৰে স্থানীয় ৰাইজ৷প্ৰশাসনে নাও চলাচলত নীতি নিয়ম বান্ধি দিয়াৰ দাবী উত্থাপন কৰে উপস্থিত স্থানীয় ৰাইজে৷
বাগসা জিলা অখিল হিন্দীভাষী বিকাশ পৰিষদৰ সভাপতি সন্তোষ গৌড়ৰ লগতে স্থানীয় খাগ্ৰাবাৰী অঞ্চলৰ ৰাইজে ভুক্তভোগী পৰিয়াললৈ চৰকাৰে ২০ লাখ টকা আৰ্থিক সাহায্য প্ৰদানৰ দাবী উত্থাপন কৰে৷ উল্লেখ্য যে যোৱা ১৬ অক্টোবৰত বেঁকী নৈত সংঘটিত হোৱা নাও দুৰ্ঘটনাটোত নজনকৈ লোক আহত হোৱাৰ লগতে পশুধনো মৃত্যুমুখত পৰিছিল৷