স্মাৰ্ট চিটি গুৱাহাটী প্ৰকল্পত বাহিনী নৈ ভৰলুৰ উন্নয়নৰ নামত নাই কোনো আঁচনি । এই মন্তব্য ‘ছেভ ভৰলু অভিযান’ৰ সভাপতি ৰবীন্দ্ৰনাথ মজুমদাৰৰ । মঙলবাৰে গুৱাহাটী প্ৰেছ ক্লাৱত এক সংবাদমেলত তেওঁ এইদৰে কয় । ভৰলু নৈক পুনৰুজ্জীৱিত কৰাৰ উদ্দেশ্যে আৰম্ভ কৰা ‘ছেভ ভৰলু’ অভিযান সন্দৰ্ভত জানিবলৈ দি এইদৰে স্মাৰ্ট চিটি প্ৰকল্পত ভৰলুৰ বাবে একো নাই বুলি তেওঁ দুখ প্ৰকাশ কৰে ।
তেওঁ কয়, ‘আমি আলপতেহে গম পালো যে ভৰলু নৈৰ উন্নয়ৰ বাবে এই প্ৰকল্পত কোনো আঁচনি নাই । এই কথাই আমাক আঘাত দিছে ।’ মজুমদাৰে ভৰলু নৈক ৰক্ষা কৰাৰ ক্ষেত্ৰত চৰকাৰৰ বহু কৰণীয় আছে বুলি উল্লেখ কৰি জনসচেতনতাও সমানেই গুৰুত্বপূৰ্ণ বুলি উল্লেখ কৰে । তেওঁ কয়, ‘১৯৭৫ ৰ পৰা ভৰলু নৈত জনসাধাৰণে আৱৰ্জনা পেলাবলৈ আৰম্ভ কৰিছিল । বিশেষকৈ সেই সময়ত প্লাষ্টিকৰ প্ৰচলন আৰম্ভ হৈছিল । তাৰ পাছতেই ক্ৰমান্বয়ে নৈখনৰ অৱক্ষয় হ’বলৈ ধৰে । কিন্তু আমি সকলোৱে সজাগ সচেতন হ’ব লাগিব । আৱৰ্জনা পেলোৱাৰ ফলত নৈখন জনস্বাস্থ্যৰ প্ৰতি ভাবুকি হৈ পৰিছে । নৈখনক লৈ বহু পৰকল্পনা কৰিব পৰা যাব । যেনে- পৰিবহণ ব্যৱস্থা, বজাৰ ইত্যাদি । কিন্তু তাৰ বাবে প্ৰথমে আমি নৈখন ৰক্ষা কৰিব লাগিব । ইয়াক বোৱতী হৈ থাকিবলৈ দিব লাগিব ।’
তেওঁ পুনৰ কয়, ‘আমি এক অভিযান আৰম্ভ কৰিছো । ভৰলুক লৈ জনসাধাৰণৰ মাজত সজাগতাৰ সৃষ্টি কৰাৰ উদ্দেশ্যে । বিশেষকৈ ছাত্ৰ-ছাত্ৰীৰ মাজত । তাৰ বাবে আমি ইতিমধ্যে কেইবাটাও কাৰ্যসূচী গ্ৰহণ কৰিছো । চাইকেল ৰেলী, ৰচনা প্ৰতিযোগিতা অনুষ্ঠিত কৰিছো । পৰৱৰ্তী সময়ত তৰ্ক, কুইজ ইত্যাদি অনুষ্ঠিত কৰিম । যাৰ দ্বাৰা ভৱিষ্যত প্ৰজন্ম সচেতন হ’ব ।’
উল্লেখ্য, সংবাদমেলত ‘ছেভ ভৰলু’ উদ্যোগত অনুষ্ঠিত হোৱা ৰচনা প্ৰতিযোগিতাৰ ফলাফলসমূহ ঘোষণা কৰা হয় । ফলাফল অনুসৰি ‘ক’ শাখাত তৃষা দাসে প্ৰথম, বাস্তৱ দাসে দ্বিতীয় আৰু হিমাংশু ডেকাই তৃতীয় পুৰস্কাৰ লাভ কৰে । তেনেদৰে ‘খ’ শাখাত হিমাঞ্চি ৰাজখোৱা প্ৰথম, ঈশানীকা কাশ্যপ দ্বিতীয় আৰু আয়ুস মেধিয়ে তৃতীয় পুৰস্কাৰ লাভ কৰে । ১৪ নৱেম্বৰত কুমাৰপাৰা নামঘৰত অনুস্থিতব্য এক অনুষ্ঠানত পুৰস্কাৰসমূহ প্ৰদান কৰা হ’ব ।