এক বিশেষ সূত্ৰৰ পম খেদি আজি খটখটী থানাৰ অন্তৰ্গত অসম নগালেণ্ড সীমান্তৰ লাহৰীজান এলেকাত আৰক্ষীয়ে অভিযান চলাই ১৬৪ গ্ৰাম নিষিদ্ধ হেৰইনসহ এজন লোকক আটক কৰে ৷
আটকাধীন লোকজন লাহৰীজানৰ সাধু ওঝা ৷ উক্ত হেৰইনখিনি ১৩ টা চাবোনৰ বাকছত ভৰাই ৰাখিছিল লোকজনে ৷
এই অভিযানৰ নেতৃত্ব দিছিল বোকাজান মহকুমা আৰক্ষী বিষয়া জন দাসসহ খটখটী আৰু বোকাজান থানাৰ ভাৰপ্ৰাপ্ত বিষয়া মৌবলিক ব্ৰহ্ম আৰু মৃদুল ৰুদ্ৰ পালে ৷
ইপিনে, নিশাৰ ভাগত বোকাজান আৰক্ষীয়ে ৩৯ নং ৰাষ্ট্ৰীয় ঘাইপথত এক বিশেষ খবৰৰ ভিত্তিত তালাচী চলাই এখন ট্ৰাকৰ পৰা বৃহৎ পৰিমাণৰ অবৈধ বিলাতী সুৰা জব্দ কৰে ৷ এন.এল.০১এ.ডি.৭১০১ নম্বৰৰ মেঘালয়ৰ পৰা মণিপুৰলৈ আহি থকা অৱস্থাত আৰক্ষীয়ে জব্দ কৰে ট্ৰাকখন ৷
আৰক্ষীৰ চকুত ধূলি দিবলৈ ট্ৰাকখনৰ ওপৰ ভাগত চিমেণ্টৰ বস্তাৰ মাজত কৌশলেৰে লুকুৱাই আনিছিল সুৰা ৷ উল্লেখযোগ্য যে সম্প্ৰতি অবৈধ কাৰ্যৰ বিৰুদ্ধে আৰক্ষী তৎপৰ হোৱাৰ বাবেই বিভিন্ন কৌশল অৱলম্বন কৰিছে অপৰাধী চক্ৰই ৷