বিশ্বখ্যাত বৈদ্যুতিক গাড়ী নিৰ্মাতা মাৰ্কিন প্ৰতিষ্ঠান টেছলাৰ স্বত্বাধিকাৰী তথা বিশ্বৰ সবাতোকৈ ধনাঢ্য ব্যক্তি এলন মাস্কে প্ৰায়ে সংবাদ শিৰোনাম দখল কৰি আহিছে । এইবাৰ মাস্কে কৰ আদায়ৰ জৰিয়তে সংবাদ শিৰোনাম দখল কৰিলে ।
মাস্কে এক টুইটত উল্লেখ কৰা অনুসৰি, চলিত বৰ্ষত তেওঁ ১১ বিলিয়ন ডলাৰ অৰ্থাৎ ভাৰতীয় মুদ্ৰাত ৮৫,০০০ কোটি টকাৰ আদায় দিব । যদিহে ঘোষণা কৰা অনুসৰি মাস্কে এই কৰ আদায় দিয়ে, তেন্তে ইউ এছ ইণ্টাৰনেল ৰেভিনিউ ছাৰ্ভিছত কৰ আদায়ৰ ক্ষেত্ৰত নতুন অভিলেখ ৰচিত হ’ব ।
আজিলৈকে ইমান বৃহৎ পৰিমাণৰ কৰ কোনো মাৰ্কিন নাগৰিকে আদায় দিয়া নাই । চলিত মাহৰ আৰম্ভণিতে মাস্কে কৈছিল যে তেওঁ যি পৰিমাণৰ কৰ আদায় দিব সেই পৰিমাণৰ কৰ আমেৰিকাৰ ইতিহাসত কোনো ধনাঢ্য ব্যক্তিয়ে পূৰ্বে আদায় দিয়া নাছিল । কিছুদিন পূৰ্বে বিশ্ববিখ্যাত ‘টাইম’ আলোচনীয়ে মাস্কক চলিত বৰ্ষৰ ‘পাৰ্ছন অৱ দ্য ইয়েৰ’ সন্মান প্ৰদান কৰিছিল ।