অসমত তৃতীয় আৰু চতুৰ্থ বৰ্গৰ চাকৰিত নিযুক্তিৰ বাবে ‘দ্য আছাম ডাইৰেক্ট ৰিক্ৰুইটমেণ্ট কমিছনচ্ ফৰ এনালগাচ্ পোষ্টছ’ বিধেয়কত কালি বিধানসভাই অনুমোদন দিয়ে । শাসক-বিৰোধীয়ে সহমতেৰে বিধায়কখনত অনুমোদন দিয়াৰ পাছত যিকোনো বিভাগৰ তৃতীয় আৰু চতুৰ্থ বৰ্গৰ পদৰ বাছনি পৰীক্ষা তথা নিযুক্তি প্ৰক্ৰিয়া একেলগে অনুষ্ঠিত হ’ব । এই আয়োগৰ জৰিয়তে বিজেপি চৰকাৰে নিৰ্বাচনত এক লাখ নিবনুৱাক নিযুক্তি দিয়া প্ৰক্ৰিয়া প্ৰথমে সম্পন্ন হ’ব বুলি বিধানসভাত সদৰী কৰে মুখ্যমন্ত্ৰী হিমন্ত বিশ্ব শৰ্মাই ।
উক্ত বিধেয়কখন অনুমোদনৰ বাবে বিধানসভাত উত্থাপন কৰি মুখ্যমন্ত্ৰীয়ে কয়, ‘যদিও আমি এক লাখ নিযুক্তিৰ কথা কৈছো কিন্তু প্ৰকৃততে ৫০ হেজাৰ পদৰ বাবে আয়োগে প্ৰথমে কাম কৰাৰ সুযোগ পাব । কাৰণ অহা মে’ৰ ভিতৰত আমাৰ ৫০ হেজাৰ নিযুক্তি সম্পূৰ্ণ হৈ যাব । যদিহে আমাৰ নিৰ্বাচনী প্ৰতিশ্ৰুতি পূৰণৰ ক্ষেত্ৰত আয়োগখন সফল হয় তেন্তে ইয়াৰ কাৰ্যকাল দীঘলীয়া সময়ৰ বাবে বৃদ্ধি কৰা হ’ব । আমি পৰীক্ষামূলকভাৱেহে প্ৰথমতে ৫০ হেজাৰ নিযুক্তিৰ প্ৰক্ৰিয়াটো শেষ কৰিব বিচাৰিছো । এই আয়োগ গঠনৰ পাছত সকলো বিভাগৰ বাছনি পৰীক্ষা একেলগে হ’ব । ইউপিএছচিৰ আৰ্হিত প্ৰাৰ্থীয়ে আবেদনপত্ৰত বিভাগবোৰ ক্ৰম অনুসৰি বাছনি কৰিব লাগিব । অৱশ্যে এই আয়োগৰ দ্বাৰা অকাৰিকৰী খণ্ডৰ নিযুক্তিকহে পৰীক্ষামূলক প্ৰক্ৰিয়াটোত সামৰি লোৱা হ’ব । কাৰিকৰী ক্ষেত্ৰৰ নিযুক্তি প্ৰক্ৰিয়া অলপ বেলেগ ।’
বিধেয়কখন অনুমোদনৰ পুৰ্বে একাংশ বিধায়কে জিলা ভিত্তিত পৰীক্ষা অনুষ্ঠিত কৰাত চৰকাৰক দাবী জনায় । বিৰোধীৰ কমলাক্ষ্য দে পুৰকায়স্থ, শ্বেৰমান আলী আহমেদ আদিকে ধৰি কে’বাজনো বিধায়কে যুক্তি দৰ্শায় যে জিলা ভিত্তিত বাছনি পৰীক্ষা পাতিলেহে তেনে জিলাবোৰৰ প্ৰাৰ্থীসকল লাভবান হ’ব । প্ৰকাৰান্তৰে পদবোৰ জিলা ভিত্তিত সংৰক্ষণৰ প্ৰস্তাৱ দিয়ে এই বিধায়কসকলে ।
কিন্তু মুখ্যমন্ত্ৰীয়ে এই প্ৰস্তাৱ নাকচ কৰি কয়, ‘সংবিধানে ধাৰ্য কৰি দিয়া অনুসূচিত জনজাতি, অন্যান্য পিছপৰা শ্ৰেণী আদি শিতানতে পদ সংৰক্ষণ হ’ব । জিলা ভিত্তিত সংৰক্ষণৰ কথা আহিব নোৱাৰে । ব্যক্তিগতভাৱে মই বৰাকৰ পদবোৰ বৰাকৰ প্ৰাৰ্থীৰ বাবে সংৰক্ষণ কৰাত আগ্ৰহী যদিও সেয়া নিয়মৰ ভিতৰত নপৰে । প্ৰাৰ্থীয়ে আবেদনৰ সময়ত নিজৰ পছন্দৰ জিলা বাছনি কৰিব পাৰিব ।’
বাছনি পৰীক্ষা অসম মাধ্যমিক শিক্ষা পৰিষদ, গুৱাহাটী বিশ্ববিদ্যালয়, ডিব্ৰুগড় বিশ্ববিদ্যালয় আদিয়ে অনুষ্ঠিত কৰিব পাৰিব বুলিও মুখ্যমন্ত্ৰীয়ে জনায় । আয়োগখন তথ্য জনাৰ অধিকাৰ আইনৰ আওতাত থকাৰ কথাও মুখ্যমন্ত্ৰীয়ে সদৰী কৰে ।