ক’ভিডত আক্রান্ত হৈ হাস্পাতালত ভর্তি কেৰালাৰ প্রাক্তন মুখ্যমন্ত্রী তথা চিপিএমৰ বর্ষীয়ান নেতা ভি এছ অচুতানন্দন । তিৰুঅনন্তপুৰমৰ হাস্পাতালত তেওঁৰ শাৰীৰিক অৱস্থা সম্প্ৰতি স্থিতিশীল ।
প্রাক্তন মুখ্যমন্ত্রীগৰাকীৰ পাৰিবাৰিক সূত্রে খবৰ, তেওঁৰ পৰিচৰ্যাৰ দায়িত্বত থকা নাৰ্ছ ক’ভিডত সংক্রমিত হৈছে । তাৰ পাছতেই অচুতানন্দনৰ ক’ভিড পৰীক্ষাৰ ৰিপ’র্ট পজিটিভ আহে । শুকুৰবাৰে ৯৮ বছৰীয়া নেতাজনক হাস্পাতালত ভর্তি কৰোৱাৰ পৰামর্শ দিয়ে চিকিৎসকে ।
কেৰালাত নতুন সংক্রমিতৰ সংখ্যা ৪১ হেজাৰ ৬৬৮ । ৰাজ্যত কৰ’নাৰ ‘সক্ৰিয়’ ৰোগীৰ সংখ্যা দুই লাখৰো অধিক । জিলাসমূহক সংক্রমণৰ মাত্রা অনুযায়ী তিনি ভাগত ভাগ কৰি সতকর্তামূলক নির্দেশনা জাৰি কৰা হৈছে । দক্ষিণৰ এই ৰাজ্যত আগন্তুক ২৩ আৰু ৩০ জানুৱাৰীত, দুই দেওবাৰে তলাবন্ধৰ দৰে বিধিনিষেধ জাৰি থাকিব ।