আজি ১৪ ফেব্ৰুৱাৰী অৰ্থাৎ প্ৰেমৰ বিশেষ দিন ‘ভেলেণ্টাইন ডে’ । এই বিশেষ দিনটোৰ বাবে গোটেই বছৰটো ৰৈ থাকে প্ৰেমিক-প্ৰেমিকাসকল । বিশেষকৈ ব্যস্ততাৰ মাজতে আপোনজনৰ স’তে এদিন পাৰ কৰাৰ উদ্দেশ্যে প্ৰেমিক-প্ৰেমিকাসকলে এই দিনটোত হাতত লয় বিভিন্ন কাৰ্যসূচী । কোনোৱে যদি পাৰ্কত, আন কোনোৱে আকৌ হোটেল-ৰেষ্টোৰাঁলৈ গৈ প্ৰিয়জনৰ স’তে মনৰ ভাৱ আদান প্ৰদান কৰে ‘ভেলেণ্টাইন ডে’ৰ দিনাখন ।
আজিৰ সমাজত ক্ৰমাৎ পশ্চিমীয়া ‘ভেলেণ্টাইন ডে’ৰ সংস্কৃতিয়ে গা কৰি উঠাৰ সময়তে অসমতো এই ভেলেণ্টাইন ডেৰ প্ৰভাৱ পৰা দেখা গৈছে । ইয়াৰ মাজতে প্ৰেমৰ দিনটোত ওদালগুৰিৰ গোলমাগাঁও চ’কত অৱস্থিত বেশ্বেলৰ বাৰ (Bachelor Bar) নামৰ ফাষ্ট ফুড বিপনীখনৰ স্বত্বাধীকাৰী ৰাহুল সূত্ৰধাৰে গ্ৰহণ কৰিছে ব্যতিক্ৰমী প্ৰয়াস । আজি প্ৰেমৰ দিনটোত যিসকল যুৱক-যুৱতী ছিংগল অৰ্থাৎ যিসকল প্ৰেমিকৰ প্ৰেমিকা নাই বা যিসকল প্ৰেমিকাৰ প্ৰেমিক নাই তেওঁলোকৰ বাবে প্ৰদান কৰিছে বিশেষ সুযোগ । তেনে ছিংগলসকলৰ বাবে আজি বেশ্বেলৰ বাৰ নামৰ ফাষ্ট ফুডৰ বিপনীখনে সন্ধিয়া পাঁচ বজাৰ পৰা নিশা আঠ বজালৈ বিনামূলীয়াকৈ উপহাৰ প্ৰদান কৰে একাপ কফি । বিপনীখনৰ স্বত্বাধিকাৰী ৰাহুল সূত্ৰধাৰে ইতিমধ্যে বিভিন্ন মাধ্যমযোগে এই উপহাৰৰ কথা ঘোষণা কৰিছে ।
উল্লেখ্য যে ওদালগুৰি চহৰৰ যুৱ প্ৰজন্মৰ এক জনপ্ৰিয় চিনাকী নাম হৈছে এইখন বেশ্বেলৰ বাৰ । যিখনত প্ৰতিদিনে সন্ধিয়াৰ পৰাই গ্ৰাহকৰ যথেষ্ট ভিৰ হোৱা দেখিবলৈ পোৱা যায় । বিভিন্ন প্ৰকাৰৰ চাহ আৰু কফি উপলব্ধ হোৱা ব্যতিক্ৰমী বিপনীখনত পোৱা যায় ভিন্ন প্ৰকাৰৰ পিজা, মেগীৰ লগতে আন বিভিন্ন প্ৰকাৰৰ খাদ্য । ওদালগুৰি চহৰৰ নেপালীগাঁও বামুনবস্তিৰ নিৱাসী পিতৃ দুৰ্লভ সুত্ৰধাৰ আৰু মাতৃ ৰিতা সূত্ৰধাৰৰ সুযোগ্য সন্তান ৰাহুল সূত্ৰধাৰ নামৰ এগৰাকী উচ্চ শিক্ষিত যুৱকৰ প্ৰচেষ্টাত গঢ়ি উঠা বিপনীখনে বৰ্তমান যথেষ্ট সমাদৰ লাভ কৰিছে ।
ইতিমধ্যে bachelor’s.in নামৰ এটা ৱেবছাইট খুলি সেই ৱেবছাইটৰ জৰিয়তে গ্ৰাহকক খাদ্য অৰ্ডাৰ কৰাৰ সুবিধা প্ৰদান কৰা হৈছে । এই সন্দৰ্ভত ৰাহুলে জানিবলৈ দি কয়, “ভাৰতবৰ্ষত পানীৰ পাছতে অধিক সেৱন কৰা সামগ্ৰী হৈছে চাহ । কিন্তু সাধাৰণভাৱে চাহ বিক্ৰী কৰাৰ সলনি এক ব্যতিক্ৰমীভাৱে সংগঠিত চাহৰ বিপনী স্থাপনৰ ইচ্ছা আছিল মোৰ । কিন্তু মই এই চাহ-কফি তথা ফাষ্ট ফুডৰ বিপনীখনৰ দ্বাৰা গ্ৰাহকৰ সমাদৰ লাভ কৰিছো । মানুহৰ মৰম-ভালপোৱাৰ বাবেই আজি বিপনীখন এইখিনি জনপ্ৰিয় হৈ উঠিল । মই বৰ্তমান ক’ষ্ট এণ্ড মেনেজমেণ্ট একাউনটেণ্ট পাঠ্যক্ৰম অধ্যয়ন কৰি আছো । অধ্যয়নৰ সমান্তৰালভাৱে বেশ্বেলৰ বাৰ নামৰ মোৰ এই বিপনীখন হৈছে প্ৰথম আৰম্ভণী । এই বিপনীখন বহু আগুৱাই নিয়াৰ সপোন মই মনত পুহি ৰাখিছো । এনেদৰে ৰাইজৰ মৰম পালে মই আগুৱাই যাবলৈ সক্ষম হ’ম ।”
ইপিনে, ‘ভেলেণ্টাইন ডে’ৰ দিনটোত বিনামূলীয়া কফি উপহাৰ সন্দৰ্ভত প্ৰশ্ন সোধাত তেওঁ কয়, “যিসকলৰ প্ৰেমিক-প্ৰেমিকা আছে তেওঁলোকৰ বাবে প্ৰতিখন ৰেষ্টুৰেণ্টে বিভিন্ন অফাৰ অথবা নতুন নতুন কাৰ্যসূচী ৰাখে । কিন্তু এইবোৰ দেখি যাতে ছিংগলসকলৰ মন নাভাগে, তাৰ বাবে মই মোৰ বিপনীখনত ছিংগলসকলৰ বাবে বিশেষ অফাৰ প্ৰদান কৰিছো । গতিকে বিভিন্নজনে আহি আজি মোৰ বিপনীত কফি খাই মোক উৎসাহিত কৰিছে । আগন্তুক দিনবোৰতো সকলোৱে এনেদৰে মৰম কৰিব বুলি আশা ৰাখিছো ।”
উল্লেখ্য যে অতি কম সময়ৰ ভিতৰতে এই বিপনীখনে ৰাইজৰ সমাদৰ লাভ কৰাৰ লগতে যুৱ প্ৰজন্মৰ মাজত জনপ্ৰিয়তা লাভ কৰিছে ।