ৰাছিয়াৰ অভিযানৰ সম্ভাৱনা বঢ়াৰ লগে লগেই ইউক্রেইনত বসবাসকাৰী শিক্ষাৰ্থীসহ সমস্ত ভাৰতীয়সকল দেশত উভতাৰ বার্তা দিলে নতুন দিল্লীয়ে । আজি দ্বিতীয় এডভাইজৰী জাৰি কৰি ইউক্রেইনৰ ভাৰতীয় দূতাবাসৰ তৰফৰ পৰা কোৱা হৈছে, অতি প্রয়োজন নহ’লে শীঘ্ৰে যেন দেশলৈ উভতি আহে সকলো ভাৰতীয় । বাণিজ্যিক উৰনৰ লগতে চার্টার্ড ফ্লাইটৰ ব্যৱস্থাও কৰা হৈছে । সেয়ে ভাৰতীয় শিক্ষাৰ্থীসকলৰ ‘ষ্টুডেন্ট কনট্রেক্টৰ’-ৰ স’তে যোগাযোগ ৰাখিবলৈ পৰামর্শ দিয়া হৈছে । লগতে ভাৰতীয় দূতাবাসৰ ফেচবুক, টুইটাৰ আৰু ৱেবছাইটতো নিয়মিত বার্তা দিয়া হ’ব বুলি জনোৱা হৈছে ।
ইয়াৰ উপৰি বৈদেশিক মন্ত্রণালয়ৰ তৰফৰ পৰা কন্ট্র’ল ৰুমো খোলা হৈছে । যিসকলে বিমানৰ টিকিট পোৱা নাই, অথবা অন্য কোনো সাহায্যৰ বাবে কন্ট্র’ল ৰুমত যোগাযোগ কৰিব পাৰিব । এয়াৰ ইণ্ডিয়াই ২২, ২৪ আৰু ২৬ তাৰিখে তিনিটা বিশেষ বিমান চলাব ইউক্রেইনত । ইউক্ৰেইনৰ বৰিছপিল আন্তর্জাতিক বিমানবন্দৰৰ পৰা ভাৰতীয়সকলক উভতাই অনা হ’ব বিশেষ বিমানত ।
ইতিমধ্যে পূৱ ইউক্রেইনত ৰুছৰ ছত্ৰ-ছায়াত থকা বিচ্ছিন্নবাদী গোষ্ঠী আৰু ইউক্রেইন সেনাৰ মাজত উত্তেজনা বাঢ়িছে । পূৱ ইউক্রেইনত শতাধিক বিস্ফোৰণৰ খবৰ পোৱা গৈছে । পৰমাণু যুদ্ধৰ মহৰাও চলাইছে ৰাছিয়াই । তেনে পৰিস্থিতিতে ইউক্রেইনৰ ৰাষ্ট্ৰপতি ভ’ল’দিমিৰ জেলেনস্কি ৰুছ ৰাষ্ট্ৰপতি ভ্লাদিমিৰ পুতিনৰ উদ্দেশ্যে বৈঠকৰ বার্তা দিছে । জেলেনস্কি মিউনিখ সন্মিলনত জনাইছে, শান্তিপূর্ণ সমাধানৰ বাবে কূটনৈতিক পথ অৱলম্বন কৰিব ইউক্রেইনে । ক্রেমলিনৰ বিৰুদ্ধে শীঘ্ৰে তেওঁলোকে প্রত্যাঘাত নকৰে বুলিও জনাইছে ।
অৱশ্যে জেলেনস্কিৰ বার্তাৰ আগতেই ৰুছ সমৰ্থিত বিচ্ছিন্নতাবাদী গোষ্ঠীয়ে জনাইছে, ডনবাছত ইউক্রেইন সেনাৰ আক্রমণত দুজন নাগৰিক নিহত হৈছে । তেওঁলোকৰ অধিকৃত অঞ্চলৰ বাসিন্দাসকলক শীঘ্ৰে ৰাছিয়ালৈ স্থানান্তৰিত কৰিববলৈ সাত লাখ পাছপ’র্টৰ ব্যৱস্থা কৰা হৈছে । পুতিনৰ মুখপাত্র দিমিত্রি পেছকভে জনায়, ডনবাছৰ পৰিস্থিতি গুৰুতৰ । ইউক্রেইনক সতর্ক কৰি তেওঁ জনাইছে, যিকোনো সৰু ঘটনাইও পৰিস্থিতি সলনি কৰি দিব পাৰে । ইয়াৰ পৰিণাম ভয়ানক হ’ব পাৰে । ৰাছিয়াই ক’তো আক্রমণ চলোৱাৰ পৰিকল্পনা কৰা নাই বুলি পশ্চিমীয়া দেশবোৰক বার্তাও দিছে পেছকভে ।
আজি জেলেনস্কিয়ে ৰুছ সমৰ্থিত বিচ্ছন্নতাবাদী গোষ্ঠীক সংঘর্ষবিৰতিৰ আবেদন জনায় । জেলেনস্কিৰ বার্তাই তেওঁলোকৰ প্রতিপক্ষে কিমান গুৰুত্ব দিছে, তাক লৈও সংশয় সৃষ্টি হৈছে । কাৰণ বেলাৰুছৰ ইউক্রেইন সীমান্তৱর্তী অঞ্চলত ৰাছিয়া আৰু বেলাৰুছৰ যি যৌথ মহৰা চলিছিল, সেয়া শেষ হোৱাৰ কথা আছিল আজি । কিন্তু মহৰাৰ ম্যাদ বঢ়োৱাৰ সিদ্ধান্ত লৈছে সংশ্লিষ্ট দুই দেশে ।
যুদ্ধৰ শংকাত ইউক্রেইনত বসবাসকালী দেশবাসীক উভতি অহাৰ বার্তা দিছে জার্মানী আৰু অষ্ট্ৰিয়াইও । কিভত অৱস্থিত নেটোৰ লিয়াজো কাৰ্যালয়ে তেওঁলোকৰ কর্মচাৰীসকলক ব্রাছেলছেত প্ৰেৰণ কৰাৰ ব্যৱস্থা কৰিছে । ইউক্রেইনত অভিযান চলালে ৰাছিয়াই নিষেধাজ্ঞাৰ সন্মুখীন হ’ব পাৰে বুলি জনায় ইউৰোপিয়ান ইউনিয়নৰ ৰাষ্ট্ৰপতি উৰ্ছুলা ভন ডেৰ লেয়েনে । জেলেনস্কিও জনায়, এতিয়াই ৰাছিয়াৰ ওপৰত আর্থিক নিষেধাজ্ঞা বলৱৎ কৰা হওক । ব্রিটেইনৰ প্রধানমন্ত্রী বৰিছ জনছনে জনাইছে, যুদ্ধৰ প্রস্তুতি কৰিছে ৰাছিয়াই । যি ১৯৪৫ৰ পাছত আটাইতকৈ বৃহৎ যুদ্ধাভিযান হ’ব ।