পাকিস্তানৰ প্ৰধানমন্ত্ৰী ইমৰান খানে ইছলামিক দেশৰ সংগঠন অ’ আই চিৰ মঞ্চত আকৌ এবাৰ কাশ্মীৰ প্ৰসংগত উত্থাপনৰে বিশ্বৰ সকলো মুছলমানক ভাৰতৰ বিৰুদ্ধে একত্ৰিত হ’বলৈ আহ্বান জনালে । এইবাৰৰ অ’ আই চি বৈঠকত চীনৰ বৈদেশিক মন্ত্ৰী ৱাংগ য়ীও উপস্থিত আছিল ।
ইমৰানে ভাষণ প্ৰসংগত কয় যে বিশ্বৰ ডেৰ বিলিয়ন মুছলমানে আজিও কাশ্মীৰ আৰু পেলেষ্টাইন সমস্যাৰ সমাধান সূত্ৰ উলিয়াব নোৱাৰে । ‘কাশ্মীৰত আমাৰ কোনো প্ৰভাৱ নাই । তেওঁলোকে আমাক গভীৰতাৰে নলয় । কাশ্মীৰৰ বাসিন্দাসকলক আত্মনিয়ন্ত্ৰণৰ অধিকাৰ দিয়া হোৱা নাই । ভাৰতে অবৈধভাৱে কাশ্মীৰক প্ৰদান কৰা বিশেষ মৰ্যাদা প্ৰত্যাহাৰ কৰিলে ।’ ভাষণ প্ৰসংগত পাকিস্তানৰ প্ৰধানমন্ত্ৰীয়ে অ’ আই চি বৈঠকত এইদৰে কয় ।
ইমৰানে লগতে কয় যে বিশ্বৰ ১.৫ বিলিয়ন মুছলমানে একত্ৰিত হৈ ভাৰতৰ ইছলাম বিৰোধী নীতিৰ বিৰোধিতা কৰা উচিত । ‘কাশ্মীৰক লৈ ভাৰতে হেনো হেঁচাৰ সন্মুখীন হোৱা নাই । মই বৈদেশিক নীতিৰ প্ৰসংগত ক’ব নোখোজো কিয়নো সকলো দেশৰে বৈদেশিক নীতি পৃথক হয় ।
কিন্তু আমি এক সংযুক্ত মৰ্চা গঠন কৰা প্ৰয়োজন, অন্যথা কাশ্মীৰ আৰু পেলেষ্টাইনত নিৰ্যাতন চলি থাকিব । কাশ্মীৰ আৰু পেলেষ্টাইনৰ নাগৰিকৰ অধিকাৰ ৰক্ষা কৰিবলৈ হ’লে বিশ্বৰ ১.৫ বিলিয়ন ইছলামধৰ্মী একগোট হ’ব লাগিব । বিদেশী হস্তক্ষেপৰ পাছতে মুছলমান দেশসমূহত সন্ত্ৰাসবাদৰ ঘটনা বৃদ্ধি পাইছে ।’ পাক প্ৰধানমন্ত্ৰীয়ে এইদৰে মন্তব্য কৰে ।