সিধু মুছে ৱালা হত্যাকাণ্ডত আন এজন ছার্পশ্বুটাৰক আটক কৰিলে পঞ্জাৱ আৰক্ষীয়ে । গায়ক আৰু কংগ্রেছ নেতা সিধুক হত্যাৰ অভিযোগত হৰকমল ৰানু নামে এজনক গ্রেপ্তাৰ কৰা হৈছে । ধৃত যুৱকজন ভাতিণ্ডা জিলাৰ বাসিন্দা ।
বৃহস্পতিবাৰে সিধু হত্যাকাণ্ডত কেশৱ নামে আন এজন ছার্পশ্বুটাৰক গ্রেপ্তাৰ কৰিছিল আৰক্ষীয়ে । যোৱা ২৯ মে’ত আত্মীয়ৰ ঘৰত যোৱাৰ পথত আক্ৰমণকাৰীৰ গুলীত নিহত হয় সিধু । হত্যাৰ দিনাখন সন্দীপ সিং ওৰফে কেকদাৰ স’তে দেখা হৈছিল কেশৱৰ । হত্যাৰ ঠিক আগমুহূৰ্তত পঞ্জাৱী গায়কৰ স’তে ছেল্ফি তুলিছিল সন্দীপে । পূৰ্বেই সন্দীপক গ্রেপ্তাৰ কৰা হৈছে । আৰক্ষী সূত্রে জানিব পৰা গৈছে, যোৱা ২৯ মে’ত সিধুৰ বাসগৃহ সংলগ্ন অঞ্চলত ৰেইকি কৰাত কেশৱক সহায় কৰিছিল সন্দীপে । হত্যাকাৰীসকলৰ অস্ত্র সৰবৰাহ কৰিছিল বুলি অভিযোগ উঠিছে কেশৱৰ বিৰুদ্ধে । তেওঁৰ সহযোগী চেতনক আগতেই গ্রেফশপ্তাৰ কৰিছে আৰক্ষীয়ে ।
ইপিনে, সিধু মুছে ৱালাক হত্যা কৰা বুলি স্বীকাৰ কৰিছে গেংষ্টাৰ গোল্ডি ব্রাৰে । এই গেংষ্টাৰৰ বিৰুদ্ধে ৰেড কর্নাৰ জাননী (আৰচিএন) জাৰি কৰিছে ইন্টাৰপোলে । হত্যাৰ ঘটনাত গোল্ডি ব্রাৰে দোষ স্বীকাৰ কৰাৰ পাছৰ পৰাই তেওঁক হেফাজতত লোৱাৰ চেষ্টা চলাইছে পঞ্জাৱ আৰক্ষীয়ে । গোল্ডিক হেফাজতত ল’বলৈ ৰেড কর্নাৰ জাননী জাৰি কৰাৰ বাবে চিবিআই-ক আবেদন কৰিছিল পঞ্জাৱ আৰক্ষীয়ে ।
চলিত বছৰৰ আৰম্ভণিতে পঞ্জাৱ বিধানসভা নির্বাচনত কংগ্রেছৰ টিকিটত প্রতিদ্বন্দ্বিতা কৰে সিধুৱে । আম আদমি পার্টিৰ প্রার্থী বিজয় সিংলাক ৬৩ হেজাৰ ভোটৰ ব্যৱধানত পৰাজিত হয় পঞ্জাৱী গায়ক ।