মঙলবাৰে দেশত ক’ভিডত সংক্রমিতৰ সংখ্যা ১১ হেজাৰ পাৰ হ’লেও বুধবাৰে সেই সংখ্যা আৰু কিছু বাঢ়িছে । কেন্দ্রীয় স্বাস্থ্য মন্ত্রণালয়ে দিয়া তথ্য অনুযায়ী, বিগত ২৪ ঘণ্টাত ক’ভিডত আক্রান্তৰ সংখ্যা বাঢ়ি হ’ল ১৪,৫০৬ । মঙলবাৰে এই সংখ্যা আছিল ১১,৭৯৩ ।
ৰাজ্যভিত্তিক ক’ভিড পৰিস্থিতিৰ প্ৰতি লক্ষ্য কৰিলে দেখা যায়, দৈনিক সংক্রমণৰ তালিকাত কেৰালাক পিছ পেলাই মহাৰাষ্ট্র এতিয়া শীর্ষত । মহাৰাষ্ট্রত দৈনিক সংক্রমিতৰ সংখ্যা তিনি হেজাৰ পাৰ কৰিছে । বিগত ২৪ ঘণ্টাত মহাৰাষ্ট্রত দৈনিক সংক্রমিতৰ সংখ্যা ৩,৪৮২ । কেৰালাতো দৈনিক আক্রান্তৰ সংখ্যা তিনি হেজাৰ হৈছে । কেৰালাত বিগত ২৪ ঘণ্টাত ক’ভিডত আক্রান্ত হৈছে ২,৯৯৩ । ইয়াৰ পাছতে আছে তামিলনাডু (১,৪৮৪), কর্নাটক (৯৬৮), পশ্চিমবংগ (৯৫৪) আৰু দিল্লী (৮৭৪) ।
বিগত ২৪ ঘণ্টাত দৈনিক সংক্রমণৰ হাৰ বাঢ়ি হ’ল ৩.৩৫ শতাংশ । মঙলবাৰে দৈনিক সংক্রমণৰ হাৰ আছিল ২.৪৯ শতাংশ । ক’ভিড বুলেটিন অনুযায়ী, বিগত ২৪ ঘণ্টাত ক’ভিডত আক্রান্ত হৈ মৃতৰ সংখ্যা ৩০ । ইয়াৰ ভিতৰত কেৰালাতেই ১২ জন লোক ক’ভিডত আক্রান্ত হৈ প্রয়াত হৈছে । ইয়াৰ উপৰি মহাৰাষ্ট্রত পাঁচজন, দিল্লীত চাৰিজন, গোৱত তিনিজন, বিহাৰত দুজন, কর্নাটক, ৰাজস্থান, উত্তৰ প্রদেশ আৰু পঞ্জাৱত এজনৰ মৃত্যু হৈছে । মঙলবাৰে ক’ভিডত আক্রান্ত হৈ মৃতৰ সংখ্যা আছিল ২৭ । পৰিসংখ্যা অনুযায়ী, ক’ভিডত আক্রান্ত হৈ ভাৰতত মৃতৰ সংখ্যা বাঢ়ি হৈছে পাঁচ লাখ ২৫ হেজাৰ ৭৭ ।
সমগ্ৰ ভাৰততে এই পর্যন্ত ১৯৭ কোটি ৪৬ লাখ ৫৭ হেজাৰ ১৩৮ টিকাকৰণ হৈছে । কেন্দ্রীয় স্বাস্থ্য মন্ত্রণালয়ৰ ক’ভিড বুলেটিন অনুযায়ী, বিগত ২৪ ঘণ্টাত ক’ভিডমুক্ত হৈছে ১১,৫৭৪ জন । এই পর্যন্ত দেশজুৰি সুস্থ হৈ উঠিছে চাৰি কোটি ২৮ লাখ আঠ হেজাৰ ৬৬৬ জন । বর্তমান সুস্থতাৰ হাৰ ৯৮.৫৬ শতাংশ ।